BETONG, 5 Feb: Komiti Pemansang enggau Pengelikun Genturung Pendiau (JKKK) sereta Biro Orang Indu diperansang negutka kerejasama ngambi semua program ti diatur bejalai lanchar sereta meri penguntung tauka empas ngagai komuniti.
Nampung berita UKAS, Kaban Parlimen Betong, Dr Richard Rapu madahka, Biro Orang Indu iya nya siti biro ba baruh JKKK lalu nyau deka semua JKKK di sitak Betong udah numbuhka biro nya.
“Entara program ekonomi ti suah diatur nengah Biro Orang Indu baka ngaga kuih, nyumai sereta ngaga krafjari.
“Program rama enggau kelas ngajat mega mesti diatur awak ke main asal kitai nya semampai ditemu enggau dipelajarka nembiak rebak dudi,” ku iya.
Nangkan ke nya, Dr Richard nerangka ari sukut pelajar Biro Orang Indu ulih ngatur program tuisyen ti ngaul nembiak sekula ba rumah panjai.
Iya madahka ninting taun pengari rayat bisi ngungkupka turu ngagai JKKK enggau Biro Orang Indu dikena ngatur program ke tau meri empas ngagai komuniti tauka pengani rumah panjai enggau genturung pendiau.
“Aku meransang sida ulih nguna manah turu ke diberi nya ngatur program ke bekaul ti tau mantu nyungkak ekonomi, rama enggau pelajar dalam komuniti,” tandu iya.
Ba pengerembai ke sama, iya minta profil rumah panjai digaga enggau enti sema udah bisi mesti dikemanah ngambi ke nya ulih nyadi sistem dikena nyimpan data ke beguna ungkup rumah panjai.
Iya mansutka jaku nya rambau ngarika Sapit Premier Sarawak, Datuk Amar Douglas Uggah Embas ngulu Program Ngelancharka Komiti Pemansang enggau Pengelikun Genturung Pendiau (JKKK) & Biro Orang Indu Suri Tengah, Debak enggau Program Tamat Ngajat lebuh Hari Enam.
Nya alai, beserimbai enggau program nya Dr Richard bisi ngungkupka turu sepenyampau RM5000 ngagai Biro Orang Indu Suri Tengah dikena biro nya ngatur program ke bekaul.-TVS
