KUCHING, 4 Feb: Perintah Sarawak benung berunding deka numbuhka skim gaji kediri ungkup orang gawa perintah menua tu.
Premier Sarawak, Datuk Patinggi Tan Sri Abang Johari Tun Openg madahka tu berindik ari gaji ti diterima pengereja pengawa perintah Sarawak ke diatu udah enda berapa nemban.
Ku iya, pekara nya deka diperundingka enggau ngiga chara ke engkeman dikena misahka skim pinchin.
“Nya kebuah, skim gaji kediri empu ungkup pengereja pengawa perintah nengeri deka ditumbuh ngambi ke seriris enggau atur pengawa di Sarawak. Kami ari perintah deka ngiga chara ngambika bisi skim gaji kitai empu ti enda besangkut paut enggau ordinan pinchin sereta gaji kita enda nyangkut pekara nya.
“Kitai ulih ngiga siti skim ke setipak enggau chara atur pengawa kitai (Sarawak). Udah tentu orang madah, enti gaji besai, kitai deka bulih sida ti pakar, nya kebuah kitai deka berundingka pekara tu.
“ Aku enda ulih besemaya laban pekara tu benung diperundingka. Aku minta semua kita besampi aja mih,” ku iya.
Iya mansutka jakunya rambau bejadika pengerami makai lemai Opis Tanah Enggau Survei (Landas) Summit 2023 ba Palan Konvensyen Borneo Kuching (BCCK) lebuh Hari Lima.
Sama bisi datai Sapit Premier Sarawak, Datuk Amar Awang Tengah Ali Hasan enggau Dato Sri Prof. Dr Sim Kui Hian, Sapit Menteri Pengatur Mengeri, Tanah enggau Rampa Menua, Datuk Len Taliff Salleh, Direktor Opis Tanah enggau Survei Sarawak, Datu Abdullah Julaihi enggau ke bukai.-TVS
