KUCHING, 4 Feb: Opis Menteri Infrastruktur enggau Pemansang Penyangkai Kapal (MIPD) deka terus ransing bejalaika tangkup pengawa lebih agi ngemujurka projek pemansang di serata Sarawak.
Ku Menteri MIPD, Datuk Amar Douglas Uggah Embas, agi mayuh pekara ke mesti diberi perati opis menteri enggau semua ejensi ke ba baruh MIPD dalam taun tu.
“Kitai udah bejalaika pengawa mutarka mayuh projek sakit taja pan pekara nya agi nyadi entara penanggul ke ditapi.
“Naka ke diatu, bisi 340 projek tejanggal ba dalam kategori raya,” ku iya madah.
Uggah ke mega Sapit Premier Sarawak nerangka Premier Sarawak rambau Aum Koordinasyen Pemansang Nengeri di Kapit empai lama minta Opis Kereja Raya (JKR) enggau Opis Parit enggau Entali Ai (JPS) nentuka semua projek pemansang ke ba baruh MIPD digaga tembu nitihka timpuh enggau kualiti ke udah ditetapka.
Iya mega pechaya nengah kerejasama ti rayat, sukung enggau pemereti semua orang pengawa ke diberi nya ulih lanchar dipejalaika.
“Kitai ulih belajar ari penyilap sebedau tu, seraya ngemeratka guna teknologi baru.
“Aku mega beterima kasih ngagai dua iku Sapit Menteri aku iya nya Dato Majang Renggie enggau Ir. Aidel Lariwoo laban udah mantu sereta meri sukung ngelama tu,” tandu iya.
Entudi ke nya, senentang prestasi MIPD ba taun siti nyin suba, Uggah madahka ari penyampau RM7.724 juta Agih Belanja Ngatur, penyampau RM7.548 juta tauka 97.71 peratus udah dikena.
Taja pan pia, iya nerangka ungkup Agih Belanja Pemansang ari RM942.991 juta ti udah diungkupka penyampau RM642.751 juta tauka 68.16 peratus udah dikena.
Iya mansutka jaku nya rambau program Taun Baru Cina 2023 opis menteri ke digulu dua iku sapit iya Dato Majang Renggie enggau Ir. Aidel Lariwoo, Kaban Parlimen Betong Dr Richard Rapu, Sekretari Tetap Opis Menteri Chiew Chee Yaw sereta Direktor JKR Nengeri Richard Tanjan ensanus. -TVS
