KUCHING, 4 Feb: Pengawa ngaga indu opis baru ungkup Kaunsil Mengeri Padawan (MPP) diperambu deka berengkah ujung taun tu.
Chairman iya, Lo Khere Chiang madah, naka tu raban MPP agi ba tikas perambu enggau ngaga pelin begunan.
“Kami (MPP) nganti maya endur ngatur taklimat begulai enggau Sapit Premier sereta Premier Sarawak.
“Ari nya kami deka ngulihka penemu lalu nentuka kos belanja ke patut diguna kami ungkup diperati ba tengan taun taun.
“Pia mega kami deka nentuka berapa penyampau belanja ke patut diguna kami ari perintah nengeri dalam tengan taun tu”ku iya.
Lo ke mega Kaban Kunsil Nengeri (ADUN) Batu Kitang madah munyi nya Nyerumba Pengerami Rumah Tebuka Taun Baru China 2023 diatur Kaunsil Mengeri Padawan ba Laman Besai Indu Opis MPP, Kemari.
Nangkan ke nya, Lo madah sida diatu agi ba tikas perambu enggau ngaga pelin (begunan) dalam taun tu lalu deka ngatur aum dulu kelimpah ngarapka pelin begunan nya ulih diputuska dalam ujung taun tu.
Lebuh ngelansa silik pasal begunan MPPiya ke diatu, Lo madah nya deka ditukar nyadi palan komersil bekau ari peminta Premier Sarawak, Datuk Patinggi Tan Sri Abang Johari Tun Openg.
Tandu Lo naka tu sida (MPP) bedau berunding pasal tu tang laban Premier, Datuk Patinggi Tan Sri Abang Johari Tun Openg udah minta sida ngaga begunan tu nyadi palan komersil.
Beduduk ari nya ku iya, MPP deka ulih nambahka penatai pemisi dikena bejalaika projek bukai. Taja pia, iya madahka RM60 juta ti dikemendarka sebedau tu enda chukup dikena ngemujurka projek nangkan ke nya.
Lo mega madahka palan pelajar entara utai ti deka disedia dalam palan komersil nya.
Indu opis MPP ke baru nya ila deka digaga sepiak Palan Jelu Siga Semenggoh ngena agih belanja ke udah dikemendarka sepenyampau RM60 juta ari perintah sarawak kena 19 Ogos 2021.
Sama bisi datai enggau ngerichahka pengerami tu iya nya Sapit Premier Dato Sri Dr. Sim Kui Hian sereta Adun Kota Sentosa, Wilfred Yap.-TVS
