KUCHING, 3 Feb: Ujan bangat ke nyadi kemari ngujungka sekeda endur ba Pelilih Siburan dituntung penusah ampuh bah.
Naka tengahari tadi, urung 97 iku raban orang tasah bah dipindah ngagai Palan Pengenduh Sementara (PPS) ba Pelilih Siburan.
Sekretariat Komiti Penyanga Penusah Nengeri Sarawak (JPBNS) madah penambah nya ngujungka siti agi PPS dibuka ba Dewan Kampung Mundai pukul 8 pagi tadi.
Bisi 25 pengani ari tiga pintu ruang bilik benung ngenduh ba PPS Dewan Kampung Mundai.
Dulu ari nya, PPS SK St Peter di Kampung Simpok dibuka pukul 6 pagi ke alai 72 iku orang dipindah ngagai endur nya datai ari 42 buah ruang bilik.
Berebak enggau nya, Opis Meteorologi Malaysia sehari tu ngeripotka Sibu, Mukah, Kapit, Bintulu enggau Miri disadang ujan, udah nya nadai ujan disadang ba Kuching, Serian, Samarahan, Sri Aman, Betong, Sarikei enggau Limbang. – TVS
