SELANGAU, 30 Jan: Munyi utai ke balat merentum nuju rumah udah ngemegauka urung 15 iku pengani ke nguan dua pintu bilik ba Rumah Impu, Sungai Buloh ditu malam tadi.
Siku indu ke dulu ninga munyi berasai amat tekenyit laban rumah sida nyau beganyang pengudah ke ninga munyi merentum nya.
Pengudah diperesa, dia sida baru nemu utai ke merentum ketegal tanah tusur nuju rumah sereta tepeda ke siti tiang ba belakang sebuah agu nyau kekitang.
Nitihka penerang ari Opis Bomba enggau Penyah Penusah Malaysia (JBPM) Zon 4 Sibu, penusah nya diripotka nyadi urung pukul 8 malam.
Bekau ari nya, seraban tujuh iku bomba ari JPBM Selangau udah diasuh ngesah penusah nya.
“Lebuh datai ba rumah panjai nya urung pukul 9.18 malam, raban bomba terus meresa kandang rumah lalu tepedaka siti tiang rumah amat begitang lalu nya ngirauka ati peranak rumah panjai nya,” ku Tuai JPBM Zon 4 Sibu, Penguasa Kanan 1 Jangan Muling.
Nangkan ke nya, Jangan madah 15 iku peranak ke nguan rumah nya udah diasuh mindah sereta ngenduh ba rumah kaban belayan ke besemak.
Taja pia, nadai sebarang penusah bebadi nyawa diripot bekau ari penyadi tanah tusur nya. – TVS
