BINTULU, 29 Jan: Pengawa ngaga infrastruktur enggau nyendiaka akses telekomunikasyen nyengkaum internet entara pemansang ti benung chakah dipejalaika nengah ejensi bekaul di serata Sarawak.
Tu seriris enggau juluk Premier Sarawak, Datuk Patinggi Tan Sri Abang Johari Tun Openg ti chukup ngemeratka pemansang ekonomi digital enggau pekara pelajar.
Menteri ba Opis Premier Sarawak, Datuk John Sikie Tayai madahka, dikena mutarka penanggul internet di serata nengeri perintah udah ngemendarka projek ngaga tiang pemanchar di serata Sarawak nyengkaum ba sitak Kunsil Nengeri (DUN) Kakus.
“Perintah Sarawak udah ngemendarka projek ngaga tiang pemanchar digaga di serata Sarawak nyengkaum ba kitai ditu DUN Kakus.
“Pengawa ngaga tiang pemanchar tu bisi ke udah tembu enggau benung digaga,” ku iya madah.
Berebak enggau nya, ku iya madah tiang pemanchar deka didirika ba tetiap kandang endur nyerangkung di Belungai enggau Penyarai sereta endur bukai awak ke rayat di menua pesisir ulih ngasaika bungkur internet ke lebih manah.
Bepelasarka rikod, Sapit Menteri Utiliti enggau Telekomunikasyen Datuk Liwan Lagang rambau aum Kunsil Nengeri (DUN) Sarawak ujung taun 2022 madahka sepenyampau 7,000 tiang enggau struktur pemanchar deka digaga di serata Sarawak dikena nambahka bungkur telekomunikasyen lebih agi di menua pesisir.
Naka ke diatu, bisi 3,471 tiang pemanchar udah didirika enggau ari penyampau nya 3,186 udah ulih dikena seraya 285 tiang pemanchar ditaga ulih dikena dalam suku kedua taun 2023.
Pengerembai bukai, John ke mega Kaban Kunsil Nengeri (ADUN) Kakus nerangka semua rayat ba rumah panjai diperansang seruran begempung enggau diri serumah lebuh ngatur pengawa ngambi ke lempung sereta mujur.
Iya mansutka jaku nya rambau Program Mangkung Tiang Rh Micheal China Guang, Kakus lebuh Hari Enam.
Bepelasarka rikod, Rh Micheal China kala ditinggang penusah angus dalam taun 2015 enggau udah nya ngentak rumah panjai baru nengah inisiatif perintah Sarawak.
Beserimbai enggau program nya, Kaban Parlimen Selangau Edwin Banta bisi nyuaka chek Projek Mit Menua Pesisir (MRP) sepenyampau RM15,000 ngagai Gerempung Tuai Peranak enggau Tuai Raban Bansa (KMKK) pelilih Tatau.
Datuk John Sikie Tayai mega bisi meri geran MRP sepenyampau RM10,000 ngagai biro orang indu rumah panjai nya.-TVS
