KANOWIT, 29 Jan: Penumbuh Ejensi Gerempung RASCOM (RASDA) ti deka ditumbuhka udah tu meri penguntung ngagai rayat ke mendam di pelilih Kanowit enggau Selangau.
Kaban Parlimen Kanowit, Datuk Aaron Ago Dagang madahka perintah Sarawak udah ngungkupka agih belanja ke besai sepenyampau RM1.5 bilion dikena bejalaika pemansang ba empat Skim Pengentap Endur Berumah Baru Kandang Pengelikun Rajang (RASCOM) di Kanowit enggau Selangau ngambi ke lebih berurun sereta sistematik.
Iya madahka, projek nya ngaul empat palan pengentap berumah ke nyerangkung di Machan, Ngemah, Tamin, sereta Kakus.
“Bisi siti projek besai udah dipadahka Premier rambau pengawa bepilih empai lama ke udah.
“Engka bisi bala di Kanowit ditu bedau nemu kitai deka begempung enggau kandang endur bukai numbuhka siti ejensi pemansang ti dikumbai RASDA,” ku iya madah.
Beduduk enggau nya, iya ke mega nyadi Menteri Penyerakup Menua nerangka nengah agih belanja ke besai nya mayuh projek deka dilanggur ba baruh RASDA lebih agi ari sukut infrastruktur enggau program ke tau mantu nyungkak ekonomi rayat ba kedua-dua pelilih nya.
“Aum mega deka diatur ti mai tuju deka beratika entara pemansang ke ulih dipejalaika nguna agih belanja ti diberi perintah sarawak.
“Aku ngarapka rayat ba sitak nya nyukung penumbuh RASDA ti dikearapka meri penguntung ke besai ngagai rayat di Kanowit enggau Selangau,” tandu iya.
Iya mansutka jaku nya rambau Program Makai Lemai Beserimbai enggau Ulang Taun Ke-28 Gerempung Peladang Kandang Menua (PPK) Kanowit lebuh Hari Enam.
Program nya keterubah diatur ti mai tuju meri pengaga ati ngagai semua kaban, tuai unit, pengereja pengawa pengatur sereta kaban kaunsil raban PPK Kanowit ke udah bekenanas gawa ngemansangka menua dalam sektor pengeluar enggau mekalka pemakai. – TVS
