BETONG, 28 Jan: Projek Transmission Line ti deka dipejalaika Sarawak Energy Berhad (SEB) sigi beguna amat dikena mekalka kuasa karan ke lebih manah, lebih agi di Betong.
Nampung berita UKAS, Sapit Menteri Nembiak, Lumba enggau Pemansang Pedagang Dato Gerald Rentap Jabu madahka penembu projek ngaga sub-stesyen ba Serudit bisi daya nambahka bungkur bekal karan ba pelilih nya.
“Aku pechaya pengawa mekalka kuasa karan ke lebih manah ulih mantu nyungkak aktiviti ekonomi rayat ba pelilih tu lebih agi ari sukut dagang enggau dagang temuai,” ku iya madah.
Beduduk enggau nya, Rentap ke mega Kaban Kunsil Nengeri (ADUN) Layar nerangka iya beterima kasih ngagai pengempu tanah ke meri kerejasama ngemendarka tanah sida nyadi endur bejalaika projek nya.
“Terima kasih ngagai pengempu tanah ke udah ngemendarka tanah sida nyadi endur bejalaika projek tu sereta enda mayuh kelikuh dikena nentuka projek tu ulih tembu,” tandu iya.
Rentap mansutka jaku nya rambau Program Nyuaka Chek Pampas Tanah Projek ‘Serudit – Sri Aman 132KV Transmission Line Project (Betong Sector)’ ba Betong Digital Innovation Hub lebuh Hari Lima.
Nangkan ke nya, iya meransang penerima bayar pampas tanah nguna manah duit ke diberi ngagai sida nya.
Penyampau semua bayar pampas ke diserahka ba dalam program nya RM386,151.10 ke ngaul 21 iku penerima.
Sida bukai ke bisi ngulu program nya Penguasa Tanah enggau Survei Bagi Menua Betong Moris Nayup, Pegawai ari Sarawak Energy Berhad (SESCO) Betong, Hendrick Litor sereta tuai peranak enggau tuai raban bansa ke semak dia.
