KUCHING, 27 Jan: Kerejasama entara menua Brunei enggau Malaysia nengah Sarawak endang patut terus ditegutka ukai semina ari sukut ekonomi, pengawa dagang enggau dagang temuai aja, tang mega ngaul sekeda industri.
Dekan Fakulti Sains Sosial dan Kemanusiaan Universiti Malaysia Sarawak (UNIMAS), Prof. Dr. Neilson Ilan Mersat madah, Sarawak diatu bisi industri nguna teknologi tinggi (high-tech industry), industri minyak enggau gis (O&G industry), industri berat, industri halal sereta Petroleum Sarawak Berhad (PETROS).
“Semua industri nya begunaka pemeranak puku ari menua luar baka ari Brunei dikena mantu ngelengkaska pemansang sereta ngerembaika agi industri ti tau meri pemanah ngagai rayat di menua tu,” ku iya madah rambau ditelefon pemberita TVS lebuh Hari Empat.
Nangkan ke nya, Dr Neilson nerangka rayat ke diau semak enggau menua Brunei baka di Miri ulih ngasaika penguntung nengah kaul ti manah antara kedua-dua menua.
“Nengah kerejasama ekonomi, pedagang mit enggau jelan pemesai (PKS) Sarawak bisi peluang besai ngerembaika produk sida rembus ngagai makit Brunei sereta menua luar bukai dikena nambahka asil penatai pemisi diri ba pengawa dagang.
“Nitihka penerang ti dikeluarka Opis Premier Sarawak, Sarawak deka ngelanjar Malaysia Frequent Traveler Programme (BMFTP) ke Kompleks Kastam, Imigresen, Kuarantin enggau Pengelikun (CIQS) Merapok enggau Sindumin dikena ngemudahka pejalai temuai ke Kota Kinabalu. Pekara tu tau mantu nyungkak industri dagang temuai di Sarawak enggau Sabah,” tandu iya.
Kelimpah ari nya, jam operasyen CIQS Sarawak enggau Brunei mega deka disambung baru ngagai jam sebedau tu berengkah ari pukul 6 pagi nyentuk 12 tengah malam.
Tuju nya dikena meri peluang ngagai kedua-dua menua beratika proses digitalisasyen ba kedua-dua palan meresa dikena ngelengkaska pejalai temuai ke datai.
