MIRI, 27 Jan: Kaul ti rat antara menua Brunei Darussalam enggau Malaysia nengah Sarawak endang udah lama ditanggam sekalika agi pengawa dagang enggau dagang temuai.
Kaban Kunsil Nengeri (ADUN) Telang Usang, Dennis Ngau madahka, nengah kaul nya rayat Sarawak, lebih agi sida ke mendam ba menua adap ke utara baka Miri, Limbang enggau Lawas deka terus ngasaika penguntung.
“Ambika chunto rayat Brunei suah nurun ke Miri ketegal ngaduka pegawa , bebelika barang tauka raun nemuai ngelantangka ati.
“Nya kebuah rayat Sarawak mesti ngambi peluang nyadi orang dagang nyual mayuh macham barang ke tau narit ati rayat tauka temuai ari menua Brunei sereta meri asil penatai pemisi,” ku iya madah rambau ditelefon pengarang berita TVS lebuh Hari Empat.
Berebak enggau nya, Dennis nerangka rayat ba kandang menua utara Sarawak mesti nguna manah perengkaguna ke bisi disediaka perintah Sarawak baka Opis Dagang enggau Dagang Temuai ti deka digaga di Brunei.
Iya madahka, nengah kerejasama numbuhka opis nya produk ke digaga rayat Sarawak ulih rembus nyentuk ke menua luar ukai semina dijual ba dalam menua tu.
Sebedau tu, Opis Premier Sarawak bisi mansutka penerang ti madahka Sarawak ngembuan juluk deka bekerejasama enggau Brunei ba pengawa ngemodenka sektor betanam betupi enggau sekeda industri ke bukai ti nyerangkung pengawa bumai, nupi jelu sereta ikan.
“Sarawak entara menua ke pemadu semak enggau Brunei, lalu rayat menua tu patut nyukung pengawa ti dipejalaika perintah Sarawak ba baruh iring Premier Sarawak, Datuk Patinggi Tan Sri Abang Johari Tun Openg.
“Tu nyengkaum terus negutka kaul ke manah begulai enggau rayat Brunei ngambi ke rayat ba kedua-dua menua tu sama mansang ke mua sereta bela ngasaika pengelantang,” tandu iya.
Abang Johari madahka, Opis Dagang enggau Dagang Temuai Sarawak di Bandar Seri Begawan Brunei deka berengkah dibuka taun tu.
Pengawa ngaga opis nya dipejalaika pengudah nerima pemendar ari Sultan Brunei, Sultan Hassanal Bolkiah maya nerima penatai Menteri Besai, Datuk Seri Anwar Ibrahim ba Istana Nurul Iman ensanus. – TVS
