MIRI, 26 Jan: Rayat Sarawak diperansang ngalih ari bekebun nguna chara lama tauka konvensional ngagai chara pintar tauka moden.
Premier Sarawak, Datuk Patinggi Tan Sri Abang Johari Tun Openg madahka chara nya ulih mantu nambahka pemayuh asil kebun, seraya nambahka asil penatai pemisi pekebun.
Ku iya madah, peranak menua tu lebih agi di Miri mesti ngambi peluang nya sereta mantu ngerembaika ekspot ke menua Brunei.
“Aku deka peranak di Miri lebih agi sida ti bisi tanah ngalih ngagai pengawa bekebun pintar. Kita ulih ngeluarka pemakai ari pengawa betanam nya sereta pedagang di Brunei mega deka bekerejasama enggau kitai dalam pengawa bedajaka produk tu ke makit halal. Tu ketegal Brunei bisi ngeluarka setipikit dikena ngaku produk ti halal, lalu ulih dijual ke menua Timur Tengah.
“Aku mega bisi betelefon enggau pengari Dubai, lalu sida deka begunaka bekal nanas. Nanas ulih dijual di Dubai enggau mega India sereta menua bukai. Tu kebuah kitai mesti bisi Opis Dagang enggau Dagang Temuai di Bandar Seri Begawan ti nyadi pelantar sereta ulih dikerembai ngagai makit dunya. Siku-siku orang ti ngembuan pengelandik dalam bidang betanam betupi, tu mih maya sida patut ransing agi gawa,” ku iya.
Berebak enggau nya, Abang Johari nerangka siku-siku orang ti ngembuan pengelandik dalam bidang betanam betupi diperansang ngambi peluang nya sereta pintar nempa langgur penemu ke baru dikena ngemansangka Sarawak.
Pemujur tu deka mai Sarawak nyadi menua ke bulih asil penatai pemisi ke tinggi di Malaysia. – TVS
