SIBU, 23 Jan: Pengerami Taun Baru China (TBC) ke dirami dua pintu ruang bilik betukar sinu pengudah rumah sida ba Jalai Yun Chai Lok, Sungai Bidut, ditu angus ba penusah ke nyadi pagi kemari.
Penusah ke nyadi urung pukul 8 pagi nya ngujungka 16 iku pengani lenyau rumah alai beteduh kelimpah sebuah kerita mega angus lengis.
Tuai Opis Bomba enggau Penyah Penusah Malaysia (JBPM) Sarawak Zon 4 Sibu, Penguasa Kanan 1, Janggan Muling madah, pengudah nerima kangau tasah, 10 iku staf ari Balai Bomba enggau Penyah Penusah (BBP) Sungai Merah digerah ngesah penusah nya.
“Komander operasyen madah rumah keterubah ke diuan lima iku pengani angus 90 peratus lalu sebuah agi rumah ke berimbai dia diuan 11 iku pengani angus 60 peratus.
“Raban operasyen BBP Sungai Merah ke bela dibantu lapan staf ari BBP Sibu Sentral mujur ngerara api pukul 9.36 pagi,” ku iya nengah sebengkah penerang media, kemari.
Taja pia, ku iya tugung uras ke angus ba palan engkah kerita ba rumah keterubah ngujungka pengawa meresi endur nya lama mimit.
Kenu ku Jangan, nadai penusah penusah bakal tauka bebadi nyawa nyadi bekau ari penusah nya lalu kebuah penusah nyadi agi dipansik.-TVS
