KUCHING, 22 Jan: Perintah besai endang patut beratika pemansang di Sarawak, berindik ari kandang menua tu entara ke mayuh meri asil penatai pemisi ngagai menua.
Ku Premier Sarawak, Datuk Patinggi Tan Sri Abang Johari Tun Openg madah, pekara nya mesti diberi perati awak ke Sarawak ulih nerima pemansang ke sebela enggau di Semenanjung.
Iya madahka, pemutus perintah besai empai lama ke meri kuasa ngagai Sarawak enggau Sabah bejalaika projek penyampau RM50 juta ke baruh sigi engkeman dikena nyeliahka projek pemansang ba kedua-dua nengeri nya laun tembu.
“Endang nyadi pengarap aku ngambi ke peminta deka ngeletak Turu Pemansang Perintah Besai ba baruh ‘Tabung Amanah Kerajaan Persekutuan’ berengkah diguna di Sarawak dikena bejalaika projek RM50 juta ke baruh sereta nadai napi penanggul,” ku iya madah nengah pesan khas beserimbai enggau Pengerami Taun Baru China 2023 lebuh Hari Enam.
Berebak enggau nya, Abang Johari mantaika pengaga ati iya bekaul enggau sekeda isu tauka pekara ke agi tetangguh senentang Sempekat Malaysia 1963 (MA63) diberi perati perintah besai.
Tebal agi, mai tuju dikena nentuka semua projek pemansang ke dipejalaika ba Sarawak bejalai lanchar sereta jampat tembu.
Iya mega beterima kasih ngagai perintah besai laban udah ngaku Opis Kereja Raya (JKR) Sarawak enggau Opis Parit enggau Entali Ai (DID) Sarawak nyadi opis teknikal.
Premier Sarawak nya mega ngarapka isu bukai ke agi tetangguh, lebih agi ngaul formula agih belanja ti deka diungkupka ngagai Sarawak enggau Sabah ulih dipesetuju enda lama agi.
Iya nerangka, Sarawak udah merambu formula ti bepelasarka gaya ekonomi menua sereta ukai semina kereban ke diidar aja.
Pia mega, iya pechaya formula nya deka nyadi mekanisme ke adil dikena magi asil penatai pemisi menua ngagai Sabah enggau Sarawak baka ke ditetapka ba dalam konstitusyen. – TVS
