KUCHING, 22 Jan: Tuai Pemegai Menua (TYT) Sarawak, Tun Pehin Sri Abdul Taib Mahmud pechaya perintah Sarawak terus mekuhka pemansang ekonomi, seraya ngenuluka pengelantang pengidup rayat pupu bansa, batang pengarap, seraya enda ngira ari ni penatai sida.
Ku iya, perintah Sarawak seruran ngenatika rayat maya ngelanggur pemansang enggau ngatur belanja awak ke semua orang ngasaika pemanah ti dibai perintah ungkup pengelantang enggau pemaik menua tu.
“Asil sukung rat ti diberi rayat, nengeri kitai (Sarawak) terus ngasaika pengelantang enggau pemaik, terus maju baka nengeri bukai di Malaysia.
“Aram mih kitai bela besaup ngesan tangkup pengawa ke lebih besai dikena nyamin pemanah bida rayat pupu bansa di Sarawak,” ku iya madah.
Berebak enggau nya, Taib nerangka, sepanjai taun mayuh pengerami ke diintu rayat di Sarawak ti nyerangkung Hari Raya, Gawai Dayak, Hari Krismas, Deepavali sereta pengerami bukai.
Semua pengerami nya mega ukai semina diintu siti-siti bansa aja, tang mega digulu enggau dirichahka bansa bukai nengah konsep rumah tebuka, lalu tu mandangka penyerakup rayat di Sarawak kenyau ari kelia.
“Aku sekali agi ngelalau semua kitai terus ngemeranka budaya baka tu taja pan kitai bisi bida ari sukut budaya enggau pengarap, tang nya ukai nyadi penanggul kitai beserakup sereta bebasaka pangan diri,” tandu iya.
Iya mansutka jaku nya nengah pesan khas beserimbai enggau Pengerami Taun Baru China 2023 lebuh Hari Enam. – TVS
