KUALA LUMPUR, 21 Jan: Menteri Besai Datuk Seri Anwar Ibrahim meri Selamat Taun Baru China ngagai semua korasia China ba menua tu ti ngintu pengerami nya pagila (Hari Minggu).
Iya ngasaika pengerami besai ba menua tu nya deka meri peluang ngagai rayat nerenak semangat beserakup kelimpah endur ngelala pangan diri.
“Elemen sepenemu enggau penelap enggau pangan diri nyadi pengikat ke nyata ulih mai menua tu terus nyingkang (mansang) ke mua.
“Ngarika semua rayat Malaysia pupu bansa, aku meri Selamat Taun Baru China 2023 ngagai korasia China di menua tu,” ku iya nengah sebengkah penerang ba laman Facebook iya empu malam tadi.
Anwar nengah sebengkah video ke dibantai tiki mantaika kisah siku ribit burak benama Miki chukup kering neruska pejalai sereta terus enseput taja lelak ti tau ngasuh iya nyerah alah tang mih tetap nganti ungkup penyenang dudi hari.
Video pengelama 1.14 minit nya mega meri pesan ngagai semua rayat di Malaysia ke napi bemacham pemar enggau pemedis ngelama tu lalu ngiga penampak ke baru enda ulih ngalahka diri tang patut angkat nengah semangat penyerakup.
Menteri Besai dipeda megai ribit seraya nyebut “Laban ke nyadi sebuah menua ke merdeka, udah tuai runding enggau udah besai tuai, patut kitai negapka semua rayat, semua bansa ba menua Malaysia ti disayau.”
Korasia China deka ngintu Taun Baru China kena 22 enggau 23 Januari tu.
Dalam kelindar China, bisi 12 iku jelu ngarika bintang ba genap taun lalu taun tu gintir ribit. – TVS
