KUCHING, 21 Jan: Menteri Nembiak, Lumba enggau Pemansang Dagang, Dato Sri Abdul Karim Rahman Hamzah ngelempaika ngagai pemintar Komiti Pemilih Kaunsil Lumba Menua (MSN) nentuka pemenang Anugerah Lumba Menua (ASN) 2021.
Iya ngarap atlit Sarawak ke udah dirintai nya deka mujur kena pilih nyadi olahragawan enggau olahragawati ba renggat nasional ti deka diatur kena 31 Januari tu.
“Kitai endang ngarapka sapa-sapa atlit Sarawak ke udah nyadi chalun, sida mujur tang aku enggai ngachau komiti ti deka nentu ke nya (pemenang).
“Udah tentu pengawa meri anugerah nya ngembuan komiti endur milih sapa ti patut, kitai nejuka komiti nya bejalaika pengawa sida enggau manah,” ku iya.
Iya madah munyi nya maya dirandau pemberita pasal empat atlit Sarawak ke udah diripih kena pilih nyadi chalun pemenang ASN 2021 ba aum pemberita ke diatur na sebuah hotel tebilang ditu, malam Hari Lima.
Dulu ari nya, MSN nengah sebengkah penerang madah empat atlit antarabansa ari Sarawak udah dirintai endur milih ngempu gelar Olahragawan enggau Olahragawati Nasional ASN 2021.
Entara nya, Datuk Pandalela Rinong, Buda Anchah, Bonnie Bunyau Gustin enggau Jong Yee Khie.
Nitihka penerang Komiti Pemilih MSN udah nerima sepenyampau 49 chalun ungkup 11 kategori.
Ripih chalun nya diberita ari gerempung lumba nasional, Majlis Olimpik Malaysia (MOM), Majlis Paralimpik Malaysia (MPM), Kategori Atlit enggau Paralimpik MSN sereta Pengawa Pengawa ASN 2021.-TVS
