KUCHING, 20 Jan: Premier Sarawak Datuk Patinggi Tan Sri Abang Johari Tun Openg madah, ari iring Menteri Besai Datuk Seri Anwar Ibrahim dikearap ulih ngangkat ke nama Malaysia ba mata dunya.
Pengarap nya bepelasarka pemayuh peneleba enggau kuing tuju ke terang dikembuan Anwar ti udah dipadu nyadi Menteri Besai kena November 2022.
“Nengah pengering ke udah bisi, kitai ukai semina ulih ngangkatka nama Malaysia tang mega bejalaika pengawa bekaul enggau landskap dunya.
“Aku pechaya iya (Anwar) ulih ngangkatka Malaysia nyadi menua dibasa menua-menua luar,“ ku iya maya Pengerami Makai Lemai Nengeri begulai enggau Menteri Besai ba Palan Aum Borneo Kuching (BCCK) ditu, malam tadi.
Sama datai Sapit Menteri Besai, Datuk Seri Fadillah Yusof, Tuai Sekretari Menua, Tan Sri Mohd Zuki Ali enggau Sapit Premier Sarawak, Datuk Amar Douglas Uggah Embas enggau Dato Dr Sim Kui Hian.
Abang Johari madah, pengudah Pengawa Bepilih Besai ke-15, Gabungan Parti Sarawak (GPS) deka begulai numbuhka Perintah Penyerakup ungkup penegap politik menua ti nyadi pugu pemansang menua.
“Kami nyukung perintah ke diiring nuan (Anwar). Aku nemu nuan (Anwar) ngembuan semangat (bebendar gawa ke rayat).
“Aku andal nengah peneleba sereta penemu ke dipenggi nuan, kitai Sarawak enggau engau Sabah deka ulih numbuhka semangat beraban endur kita gawa ungkup Malaysia,” ku iya.
Pengerami Makai Lemai Nengeri nya entara program diatur beserimbai enggau penemuai gawa Anwar ke Sarawak pengelama dua hari ke bepun kemari.
Pagi tadi Anwar ngulu Aum Ngemujurka Sempekat Malaysia (MA63) begulai enggau Kepala Menteri Sabah Datuk Seri Panglima Haji Hajiji Noor, Premier Sarawak Datuk Patinggi Tan Sri Abang Johari Tun Openg, Sapit Menteri Besai Datuk Seri Fadillah Yusof enggau Menteri ba Opis Menteri Besai (Pekara Sabah, Sarawak enggau Pengawa Khas) Datuk Armizan Mohd Ali. – TVS
