KUCHING, 20 Jan: Pemikir Politik ke mega Dekan Fakulti Sains Sosial dan Kemanusiaan Universiti Malaysia Sarawak (UNIMAS), Prof. Dr. Neilson Ilan Mersat madahka, pemutus perintah besai ti setuju nambahka agih belanja khas ungkup Sabah, Sarawak nya endang nemban sereta berita manah ngagai rayat ngambi ke nyaup ngerumban pemansang, lebih agi ba kandang menua pesisir nyengkaum di Sarawak.
“Tu sigi pemutus ke manah laban senutuk enggau Pekara 112D Konstitusyen Perintah Besai ke suah disebut lebuh ngenang Sempekat Malaysia 1963 (MA63).
“Kitai ngarapka agih belanja tu ke lebih besai ulih nyungkak enggau ngerumban pemansang di Sarawak. Pia mega, pemutus tu mandangka komitmen perintah besai ti ngemeranka penyerakup,” ku iya madah.
Dr Neilson nerangka pemutus nya mega ngayanka juluk perintah besai ti deka nentuka kandang menua Sabah enggau Sarawak mega mansang seraris enggau Semenanjung.
Nangkan ke nya, iya madahka pemutus nyiri Sekretari Pekara Wang Sarawak nyadi Kaban Kaunsil Direktor LHDN mega beguna amat ba pemansang Sarawak, lebih agi orang ke dipadu nyadi pengari Sarawak nya bepelasarka profesionalisme enggau peneleba.
“Nengah chara tu kitai ulih nemu pekara ke nyadi enggau mai berita ke bekaul enggau Kaunsil Asil Dalam Menua (LHDN) ngagai Sarawak.
“Pia mega, kita deka nemu entara tangkup pengawa pengari Sarawak ba dalam LHDN. Kitai ngarapla pekara tu ulih diputar enggau dipejalaika lengkas awak ke meri pemanah ngagai Sarawak,” tandu iya.
Iya mansutka jaku nya rambau nyaut tanya pemberita TVS ti minta nerangka senentang pemutus ke dibantaika pengudah aum Majlis Pengemujur Sempekat Malaysia 1963 (MA63) di Kuching, lebuh Hari Lima.
Sebedau tu, perintah Sarawak ngelaluka pekara ti dipejalaika kabinet perintah besai baka ke ditetapka ba dalam Ripot Komiti Antara Perintah (IGC) senentang Sarawak mesti bisi pengari ba dalam LHDN. – TVS
