KUCHING, 17 Jan: Servis pengerai di Sarawak seruran dikemanah lebih agi ba bidang kardiologi tauka pakar ti mutarka penanggul tungkul ati nyengkaum penyakit arteri koronari, penyakit injap tungkul ati enggau penanggul ritma tungkul ati.
Premier Sarawak Datuk Patinggi Tan Sri Abang Johari Tun Openg madah pekara tu nyata dipeda nengah kerejasama perintah Sarawak enggau Opis Menteri Pengerai Malaysia (KKM) ke seruran ngelatih pakar dalam bidang nya.
“Kita mujur mantu mayuh pesakit, lebih agi rayat Sarawak, lalu sida ulih diperubat di menua tu empu, berebak enggau nya, ngidupka seput sida,” ku iya.
Iya madah munyi nya maya Pengerami Makai Lemai Ngintu Taun Ke-20 Palan Tungkul Ati Sarawak ba Kompleks Kunsil Nengeri, malam Hari Satu.
Sama datai Sapit Premier Dato Sri Dr Sim Kui Hian, Menteri Pengerai Dr Zaliha Mustafa enggau Tuai Direktor Opis Pengerai Tan Sri Dr Noor Hisham Abdullah.
Nangkan ke nya, Abang Johari bisi ngelansa pasal isu autonomi pengerai Sarawak ti senutuk enggau polisi menua, pemar diatu iya nya proses ngemujur ke pekara nya.
Ku iya, perintah mega begunaka model baru dikena nyendiaka servis perubat kelas satu ngagai raban pesakit.
“Baka ke ditemu kita, pendiau ba hospital, lebih agi ba Sepital Besai Sarawak, kelalu sekut. Nyadi kitai patut mutarka pekara tu,” ku iya.
Iya mega madah Sarawak begunaka sepital pesakit riman, lebih agi ba sitak menua pesisir, lalu merambu ngagai perintah besai iya nya perintah sarawak sedia nyendiaka jali agih belanja sepenyampau RM800 juta nyentuk RM1 bilion.
Ku iya, nya dikena ngelengkaska pengawa ngaga sepital pesakit riman lalu perintah besai deka mantu ari sukut perengkaguna perubat enggau staf.
“Aku deka merambu ngagai Perintah Besai, endur kitai nirika palan pesakit riman ditu.
“Kebendar, aku udah ngaga pansik lalu nyema perintah besai setuju, kitai ulih berengkah ujung taun tu,”ku iya.-TVS
