KUCHING, 16 Jun: Opis Menteri Pengerai Malaysia (KKM) ngelanggur deka nyikap klinik menua pesisir di Sarawak enggau internet satelit.
Sapit Menteri Pengerai, Lukanisman Awang Sauni madah, pekara nya diambi dikena ngemuntangka staf opis pengerai bejalaika servis dalam tali arus tauka nengah video ungkup pengawa diagnosis ngagai pesakit.
Ku iya, ungkup tuju pekara nya, KKM deka berandau enggau Opis Menteri.
“KKM udah nerima keretas kereja ari Opis Pengerai Sarawak, keterubah deka berati ari sukut servis nguna internet bepelasarka satelit ti deka disediaka ba klinik menua pesisir,” ku iya.
Iya mansutka jaku nya rambau penemuai gawa ke Klinik Pengerai Bako lebuh Hari Satu.
Lukisman nambah, opis menteri iya mega deka meri perati ngagai klinik repuk di serata Malaysia nyengkaum di Sarawak.
“Kitai deka mutarka sekeda perengkaguna pemun lebih agi pengerusak ke mit di klinik pengerai enggau ngarap dalam agih belanja ari Menteri Besai Datuk Seri Anwar Ibrahim ulih meri agih khas ungkup klinik repuk, ukai semina di Sarawak aja tang mega di serata Malaysia,” ku iya.
Sama bisi datai , Sapit Menteri Bekal Kuasa enggau Pengelikun Rampa Menua Sarawak, Dr Hazland Abang Hipni, Direktor Pengerai Nengeri Sarawak, Dr Ooi Choo Huck.-TVS
