KUCHING, 15 Jan: Pengawa ngaku sarawak nyadi sebuah wilayah diatu ulih nyungkak agi pengerembai ekonomi enggau lebih meruan.
Sapit Menteri Nembiak, Lumba Enggau Pemansang Dagang, Dato Gerald Rentap Jabu, madah Sarawak ngembuan penau ekonomi besai ke ukai semina ulih mantu ngemansangka agi wilayah tu aja tang mega ulih mantu pengerembai ekonomi menua Malaysia.
“Tu endang beguna nama kebuah kitai di Sarawak patut diaku (wilayah).
“Kitai ngarap semua anak Sarawak terus gawa enggau bebendar dikena nentuka kitai bulih penguntung enggau peluang ke bisi lebih agi diatu dalam ekonomi digital, karbon ekonomi enggau nyadi penatai pemisi ke bisi,” ku iya.
Iya ke mega Kaban Kunsil Nengeri (ADUN) Layar mansutka penemu nya maya nyaut tanya pemberita bekaul enggau jaku Sapit Menteri Besai ke mega Presiden UMNO, Dato’ Seri Ahmad Zahid Hamidi, maya Aum Besai Umno 2023 ke diatur ba Kuala Lumpur kena Hari Lima ti ngaku Sabah enggau Sarawak nyadi wilayah lalu ukai agi ditela nengeri.
Nangkan ke nya, lebuh ditanya sentang bida entara status nengeri enggau status wilayah, Rentap madah pengawa ngaku Sarawak nyadi sebuah wilayah mandangka perintah Sarawak majak mujur nuntut baru hak Sarawak baka ke udah ditanggam nengah Sempekat Malaysia 1963 (MA63) enggau Kunstitusyen Malaysia, lalu tu sebengkah ari jalai ke patut dikemegah semua rayat Sarawak.
Beduduk ari nya, iya mega ngarapka perintah besai dibaruh iring Perintah Penyerakup ulih meri autonomi ke patut ngagai Sarawak, nyengkaum autonomi ba pekara pelajar enggau pekara perubat.
“Kitai deka mulaika baru enggau minta lebih mayuh agih. Enti kitai sebagi ari tiga wilayah, abis nadai kitai bisi satu per tiga agih belanja.
“Tu mih dikedeka kami. Ari sukut bida entara nengeri tauka nyadi wilayah, kitai patut diperunding enggau patut diberi pengelebih enggau mayuh agi ari sukut belanja enggau mega patut dibasa laban nyadi orang ke enggau nempa polisi ari siti wilayah,” ku iya.-TVS
