BINTULU, 13 Jan: Raban Pengelandik Jari (RPJ) Bintulu siti gerempung ti nyadi pelantar dikena ngangkatka pengawa ngaga krafjari enggau pengemeran krafjari ari serata Sarawak, Labuan, Johor enggau Brunei Darussalam.
Penyanding Penemu RPJ Bintulu, Sandine Bennidect Ikang madah, entara pengawa ti udah dikemujurka RPJ sekumbang udah ditumbuhka iya nya nyendiaka palan bedajaka krafjari, kelas chara ngaga kraf jari ti nyengkaum kelas nengah chara dalam tali arus, sereta nempa tebangkar ke landik ba pengawa ngaga kraf jari ke ulih nyadi chunto ngagai orang bukai.
“RPJ tu iya nya siti gerempung ti ditumbuhka ba dalam media rama (Facebook) lalu diatu kaban ba dalam RPJ udah manggai 17,000 iku kaban ke udah berejister ba dalam Facebook RPJ.
Naka ke diatu, sambut ari mensia mayuh ke deka nyadi kaban RPJ chukup manah, lebih agi sida ke endang rinduka pengawa ngaga asil pengelandik jari,” ku iya rambau ditelefon pemberita TVS lebuh Hari Lima.
“Tuju kitai ngatur pekit enggau kelas tu deka ngajar enggau meri latih ngagai kaban tauka siku-siku orang ke bisi pengerindu deka begagaka krafjari ngambika ulih nyadi siti pengawa ke meri asil penatai pemisi ngagai sida, lebih agi orang indu,” ku iya.
Iya nerang, entara program ninting taun ke suah diatur RPJ iya nya pengerami Mantar Gawai tauka Hari Gawai, Ngiling Bidai, Hari Ruang Bilik, Pekit Nusuk Marik Empang, Pekit Ngaga Tanggu, ngatur kelas ngaga Kain Burie, Sugu Tinggi, betenun sereta beranyam.
Berebak enggau nya, Sandine madah, RPJ merambu deka ngatur pekit ngukir, kelas ngaga beg nguna asil ke diambi ari kampung baka rutan tauka wi, buluh sereta pekit beranyam.
“Kelimpah ari nya RPJ mega deka ngatur pekit betabuh ngaul nembiak, lalu semua program ke dilanggur nya dijangka berengkah diatur pengudah pengerami Hari Gawai taun tu,” tandu iya.
RPJ mega deka terus nyadi gerempung dalam ti ngemeranka pemanah Ngepan Iban enggau main asal Iban sereta udah kala ngambi bagi ba program Simposium Ngepan Iban (SNI) Tikas Nengeri Sarawak 2022 ti ngangkatka rambai jaku “Ngepan Pesaka Bansa, Nyungkak Pemansang Ekonomi Bansa Iban”. – TVS
