KUCHING, 13 Jan: Sekeda Gerempung Ukai Dikuasa Perintah (NGO) Gagasan NGO Dayak Sarawak ngansak perintah besai ngazet pengerami Hari Kaamatan di Sabah enggau Hari Gawai Dayak di Sarawak nyadi kemisi hari besai di serata menua.
Penyanding Penemu Pekara Wang Serakup Pemikir Dayak Sarawak (DTTAS), Nelly Tawai enggau tujuh agi gerempung NGO ke bukai nengah penerang begulai madah, udah maya iya menteri besai ke baru ngenuku Hari Gawai Dayak ti diintu kena 1 Jun di Sarawak enggau pesta Kaamatan kena 31 Mei di Sabah nyadi kemisi hari besai di serata menua.
Ku iya, pekara tu setipak enggau konsep ‘Perintah Penyerakup’ di baruh pegai Menteri Besai, Dato’ Seri Anwar Ibrahim.
Entara bala ketuai NGO ti ngansak iya nya, Penyanding Penemu Serakup Pemikir Dayak Sarawak ( DTTAS) Wellie Hendry Majang, Presiden Kongress Kebangsaan Dayak (DNC) Paul Raja, Gerempung Hak Asasi Orang Asal Sarawak (SCRIPS), Presiden Serakup Iban Sarawak (PAIS) Samuel Suring, Sekretari Sadia (MIRI) Rafael Dru, Presiden Serakup Terabai Menua (TM), Wilfred Nissem, Presiden Serakup Raban Bansa Salako Enggau Rara Sarawak (PERASA) Robert Umping Enggau Presiden Serakup Jaringan Tanahhak Adat Bansa Asal Sarawak (TAHABAS).
“Hari Kaamatan di Sabah diintu kena 30 enggau 31 Mei lalu Gawai Dayak di Sarawak diintu 1 enggau 2 Jun, nyadi kami deka hari tu diaku nyadi kemisi hari besai di serata menua ungkup Hari Kaamatan enggau Gawai Dayak kena 31 Mei enggau 1 Jun.
“Nangkanka nya, hari kemisi tambah iya nya 30 Mei ungkup Pesta Kaamatan enggau 2 Jun ungkup Hari Gawai Dayak tetap diguna ba Sabah enggau Sarawak. Enti disetuju, iya mesti digazet nyadi kemisi besai ba serata menua berengkah taun tu,” ku penerang nya kena Hari Lima.
Ku iya, kemisi ti digazet kena 31 Mei enggau 1 Jun di serata Malaysia tu beguna amat laban diperati nya ngelai pemanah perintah besai ngagai wilayah Sabah enggau Sarawak.
“ Kemisi tu mega deka meri peluang ngagai raban bansa Kadazan, Dusun, Murut, Rungus enggau Dayak ti gawa di selampur menua Malaysia ulih ngintu pengerami Hari Kaamatan enggau Gawai Dayak ba rumah sida empu lebih agi sida ti enda ulih pulai ke menua,” ku penerang nya.
Nya kebuah, kitai ngarap langgur ke baka nya sigi patut ti sebagi ari chara bebasaka hak rayat Sabah enggau Sarawak baka ke udah ditetapka ba Sempekat Malaysia (MA63).
Penuduk Sabah enggau Sarawak dalam Konstitusyen Perintah Besai Malaysia nyelai laban kededua nengeri tu mantu numbuhka menua Malaysia.
Berindik ari nya, Sarawak diatu rasmi diaku nyadi kaban kunsi Semenanjung Malaysia ti udah diteritka ba ubah Fasal (2) Perkara 1 enggau Fasal (2) enggau 160 (2).
“Ulah bebasaka bansa enggau pengarap bukai iya nya nyadi penegap politik, pengelikun enggau penyerakup pupu bansa di Sarawak enggau Sabah ngelama tu.
“Beduduk ari nya, kami arap bendar pekara tu ulih diterenak di serata Malaysia enggau pemisi pengerami Kaamatan enggau Gawai Dayak ti diintu di serata menua.
Iya arap bendar pekara diambi perati perintah besai dikena nyaga adat, budaya enggau pengerami besai orang asal Sabah enggau Sarawak. -TVS
