LUBOK ANTU, 12 Jan: Tikai lampit iya nya sebansa tikai ke digaga ari wi diperati ulih nyadi produk dagang ke berega ketegal ti majak mar digiga.
Kemaya hari tu, pengawa beranyam ke tikai lampit majak jarang dipeda beduduk ari pemedis nganyam tikai diumba beguna ke timpuh ke lama endur nembu ke siti-siti tikai.
Kelimpah ari nya, orang ke landik begagaka tikai tu pan jarang ditemu semina siku dua aja ke agi ngemeranka pengawa beranyam ke tikai lampit lebih agi sida ti nguan rumah panjai.
Siku ari orang ke landik beranyam tikai lampit, Ujan Paing asal ari Rumah Andah Nanga Sumpa, Lubok Antu madah, pengawa nganyam tikai lampit patut dipelajar rebak biak laban nya siti ari identiti dikena ngelai bansa diri lalu pesaka asal nya patut dikemegahka.
Ku iya, tetiap bansa tikai iban bebida nitihka utai kena nganyam nya nyerangkung proses ngaga pan enda sebaka.
Ambika ke banding, proses ngaga tikai lampit enda sama enggau tikai bukai baka tikai bemban, senggang enggau tikai kerupuk.
Nya kebuah, iya madah, tikai lampit entara tikai ti pemadu pedis digaga siku-siku orang laban begunaka pengelandik enggau peneleba.
“Udah lama tapi enti aku ngaga tikai lampit nya tadi entara ke lapan bulan baru tembu siti. Nya pan enti aku ngaga nya amat laban tikai wi mayuh kelikuh ngereja pengawa tu baka ngeraut ngerunti enggau ke bukai.
“Jenak dia kitai enti enggai ngambi wi enda teulih ngaga utai baka tu,” ku iya lebuh dirandau pembrita TVS.
Ngelansa pasal pemungkal iya nemu beranyam tikai lampit tu, iya madah, keterubah iya nemu beranyam tu ari pun iya angkat bujang enggau belajar ari aki ini suba.
Ketegal pengeransing enggau pengerindu ke dalam ngereja pengawa beranyam tu, ngujungka iya entara siku ke pakar nganyam nya di menua ulu Batang Ai.
Ku iya, ngembuan pengelandik nganyam tikai lampit mayuh meri penguntung ari sukut penatai pemisi ruang bilik laban ngembuan kualiti ke tinggi sereta chukup berega.
“Enti dijual, siti tikai wi berega manggai ribu ringgit nitihka pemesai enggau pengalus kerangkai jari orang ke ngaga tikai lampit tu.
“Musin orang putih ke mayuh datai suba, sida chukup rindu ke asil pengelandik jari kitai iban baka tikai tu. Laku tikai dijual maya nya lalu kala dibeli nyentuk beratus ringgit sekeda. Tu mih pun penatai pemisi kami.” ku iya.
Taja pan, pengawa beranyam tu tebal agi dikemeran orang indu di rumah panjai.
Kelimpah beranyam tikai lampit, ujan mega landik ngaga tikai bukai baka tikai bemban.
“Tu lain sebengkah tikai tu, udah diambi tadi dibelah kitai, udah nya dilinti lalu dijempi. Pengudah chukup rangkai dia kitai nganyam tu tadi.
Kekadang diberi basah dulu laban enti enda basah ngeruyup bemban nya, nadai agi ngerembai baka tu. Tikai bemban mega ulih digaga kitai bechura nitihka peneka kitai ngaga iya,” ku iya.
Ujan nerang, pemanah asil pengelandik jari komuniti Iban baka tikai lampit iya nya enti dijaga manah, tikai tu ulih tan beratus taun nyentuk ke ichit wit.
Nya kebuah, iya arap bendar rebak biak ke dudi ulih nampung ngetanka pesaka asal ngambika enda pupus diserunyut arus pemansang. -TVS
