SARATOK, 11 Jan: Rayat ke mendam ba sitak Kunsil Nengeri (DUN) Krian diperansang ngambi peluang bedagang beserimbai enggau program ‘Mountain Bike Extreme Challenge (MTB) 2023 tauka Program Lumba Ensikal Bukit ti deka diatur bulan Mei 2023.
Penyanding Penemu Komiti Pengatur Pekit, Friday Belik madah, tu ngambika sida ulih nambahka asil penatai pemisi diri, lebih agi maya bisi program besai diatur ba sitak nya ke endang ditemu digulu mayuh orang enda ngira ari dalam tauka menua luar.
“Kitai mega bisi ngatur program bukai kena 5 tauka 6 Mei ti ngaul peranak ba rumah panjai ba sitak tu enggau ngarapka sida ngambi peluang tu bejualka barang pemakai, ai irup, kraf jari baka bakul, raga, tikai, chapan sereta produk ke bukai.
“Temuai enggau mensia mayuh ulih meli barang ke dijual sida nya ngambika ulih dibai pulai nyadi tepa pengingat bisi nemuai ngagai DUN Krian,” ku iya madah rambau ditanya pengarang berita TVS pengudah ngulu Program Randau enggau peranak Rumah Panjai Richard di Lubok Kerupok Awik, Saratok ti deka nyadi alai ngatur ‘Krian Mountain Bike Challenge lebuh Hari Dua.
Berebak enggau nya, Friday ke mega Kaban Kunsil Nengeri (ADUN) Krian madah, perais mata duit sepenyampau RM12,000 mega bisi diungkupka ngagai semua pemenang pekit nya ila.
“Program MTB Krian Challenge tu udah ditetapka deka diatur kena 7 Mei 2023 sereta udah diputuska bisi lima kategori ti ngaul raban veteran enggau nembiak,” ku iya.
Sebedau tu, iya nerang, tuju program nya diatur iya nya dikena matak penatai temuai ari dalam enggau luar menua, seraya bedajaka dagang temuai lumba tauka ‘sport tourism’.
Ungkup penerang, ‘Mountain Bike Extreme Challenge (MTB) 2023′ diatur ba Wong Klangsau enggau naka ke diatu mayuh penyereta ari menua luar baka Brunei Darrusalam enggau Indonesia ngambi bagi ba dalam pekit tu.
Pekit tu keterubah diatur Palan Servis Krian begulai enggau Gerempung Ensikal Bagi Menua Betong.
Nangkan ke nya, Friday madah program lumba ensikal bukit nya mega diatur dikena ngangkatka nama menua Lempa di Kabo Tengah.
Iya mega udah tu deka ngerah peranak nyendiaka ‘homestay’ ngambika bisi endur bala temuai bemalam nyema sida deka nimpai pemanah rampa pengeraja asal di sitak nya, lebih agi baka Wong Klangsau.- TVS
