SIMUNJAN, 8 Jan: Perengkaguna pengerai ba Sarawak mesti dikemanah tikas berindik ari penambah penyampau pesakit ke ngelui pengudah COVID-19 nuntung menua kenyau ari dua taun ke udah.
Sapit Menteri Pengerai, Lukanisman Awang Sauni madah, perengkaguna pengerai ke agi ba tikas ke lama ngujungka menua tu begunaka servis pengerai ke lebih manah ungkup pengelantang rayat.
“Kitai sigi nemu kitai agi nyendiaka servis pengerai ke pemadu manah ba dunya, tang enggau taka rega ke patut tauka enda kelalu mar, seraya nyendiaka perengkaguna perubat ke ulih diasaika semua rayat ba Malaysia nyerangkung di Sarawak.
“Semina ba Sarawak kitai deka mekuhka pemansang tu laban kitai enda ulih bepanggai ba penyampau rayat Sarawak ngaga klinik, tang kitai deka ngaga bepelasarka kandang endur ke patut bisi klinik ngambika ulih meri servis pengerai enggau perubat ke manah ngagai rayat Sarawak,” ku iya iya rambau aum pemberita pengudah ngabas Klinik Indai enggau Anak sereta Sepital Simunjan.
Berebak enggau nya, Lukanisman nerang, ambika chunto ba sektor pelajar perintah ngemanahka sekula repuk, lalu tu mih maya ngemanah perengkaguna pengerai ba menua tu.
“Tu mih saran ke deka dijapai kitai taja pan pekara tu begunaka timpuh. Tang, kitai deka bisi mayuh pakar enggau perintah nengeri mekuhka pemansang sektor pelajar nengah chara ngemanahka sekula repuk.
“Pia mega, tu mih peluang kitai mansang ke mua nentuka klinik ba tikas ke manah ngambika servis pengerai ti disediaka ngagai rayat ba mengeri enggau menua pesisir sebela,” tandu iya. – TVS
