BELAGA, 8 Jan: Peminta ngemendarka pengawa ngaga Balai Bomba di Sarawak patut dilengkaska agi dikena mantu mutarka penusah angus ke suah nyadi di menua pesisir nyengkaum di Apau Koyan, Sungai Asap.
Sapit Menteri ba Opis Menteri Besai (Pekara Sabah, Sarawak enggau Pengawa Khas), Datuk Wilson Ugak Kumbong ngarapka opis menteri ke bekaul, lebih agi Opis Menteri Pemansang Kandang Menua (KPKT) lengkas ngemendarka pengawa ngaga Balai Bomba Kategori E ba Sungai Asap.
Ku iya, pekara tu chukup beguna dikena mantu mutarka penusah angus ke suah nyadi ba kandang menua pesisir ti nyengkaum ba Apau Koyan.
Iya madah, sebedau tu pekara nya udah dibai ngagai Tuai Direktor Opis Bomba enggau Penyah Penusah (JPBM) Malaysia, Datuk Seri Mohammad Hamdan Wahid ngambika diberi perati.
“Nyadi udah dipadahka Direktor Bomba Nengeri Sarawak, Datu Khirudin Drahman bekaul enggau lima buah balai bomba ke diperambu deka digaga ba nengeri tu nyengkaum sebuah di Apau Koyan, Sungai Asap.
“Beduduk enggau nya, aku ke nyadi Sapit Menteri minta pekara tu lengkas dipejalaika,” ku iya rambau ngabas peranak ba Uma Baha, Sungai Asap ke dituntung penusah angus empai lama, seraya disempulang Kaban Kunsil Nengeri (ADUN) Murum, Kennedy Chukpai Ugon lebuh Hari Minggu.
Wilson ke mega Kaban Parlimen Hulu Rajang nerang, lebih 300 ruang bilik tebunsa ketegal penusah angus ari suba nyentuk ke diatu, lalu balai bomba ke pemadu semak iya nya semina bisi ba Belaga ti ngambi timpuh dua jam datai ke Sungai Asap.
“Nya kebuah kitai mesti senaka ulih lengkas ngaga Balai Bomba Kategori E ba Sungai Asap.
“Aku minta perintah ke diatu, ejensi ke bekaul enggau KPKT beratika rintai Balai Bomba ke dipinta ba Sarawak, lebih agi ba menua pesisir baka ba sitak Parlimen Hulu Rajang,” tandu iya.
Sebedau tu, ba aum pemberita Direktor JPBM Sarawak, Datu Khirudin Drahman madah, entara perambu timpuh panjai opis bomba iya nya ngaga opis bomba ke baru di nengeri Sarawak.
Iya madah, JBPM Sarawak nyaran deka numbuhka opis bomba enggau penyah penusah ba tetiap sitak Kunsil Nengeri (DUN) enggau Parlimen ba serata Sarawak. – TVS
