SARIKEI, 6 Jan: Perintah Sarawak benung beratika enggau ngelala sekeda projek rayat ti deka dipejalaika ba baruh Ejensi Pemansang Delta Rajang (RADDA).
Projek nya nyerangkung projek rayat ti bedau kala dipejalaika lebih agi di Bagi Menua Mukah, Sarikei enggau Sibu.
Sapit Menteri Merambu Mengeri, Pengatur Tanah enggau Rampa Menua, Datuk Len Talif Salleh madah, nya sebagi ari singkang strategik perintah dikena nentuka projek nya bejalai lanchar enggau meri pemaik ngagai rayat.
Kenu ku Len Talif ke mega Kaban Kunsil Nengeri (ADUN) Kuala Rajang, perintah Sarawak keran deka ngemujurka agenda nya laban pechaya pekara nya ulih nambahka pemaik sosial enggau ekonomi rayat ungkup timpuh ke panjai.
Iya nyemetak nerang, agih belanja penyampau RM1.5 bilion ti diungkupka ngagai RADDA sebedau tu, deka diguna manah awakka juluk nya ulih dijapai.
“Pekara tu patut dikemeratka semua Kaban Kunsil Nengeri (ADUN) ba baruh RADDA tu, beratika enggau ngelala projek ti mesti dipejalaika ungkup timpuh ke semak tu tauka dalam agih belanja ti udah diungkupka Premier kitai.
“Aku pechaya nengah semua pekara ke udah dibai ba dalam aum semua projek ulih dipejalaika nyengkaum kerejasama ari opis residen sereta opis pelillih di Bagi Menua Sarikei enggau Mukah,” ku iya rambau betemu enggau Pegawai Tadbir Khas RADDA, Kelana Kipli enggau pengatur Bagi Menua Sarikei, lebuh Hari Empat. – TVS
