MIRI, 3 Jan: Pemanah rampa pengeraja asal, main asal enggau pengerami ke bisi ba Sarawak engkeman amat nempa iya nyadi palan endur begambar filem, ku Datuk Sebastian Ting Chiew Yew.
Sapit Menteri Dagang Temuai, Industri Kreatif enggau Seni Pemerindang nya madah pengawa begambar filem deka mantu ngangkatka nama Sarawak dalam kar dagang temuai lebuh sesebengkah endur nya bisi dipandang.
“Kitai ngembuan mayuh endur ke manah. Kitai meda rampa meua kitai enggau pemisi pengerami, main asal enggau pemayuh raban etnik.
“Chukup mayuh pekara ke manah ba Miri lalu aku andal Sarawak endang palan ke manah endur begambar,” ku iya ba aum pemberita mandangka wayang premium ‘Little Sunshine’ di TGV Miri, Hari Satu.
Tambah mega, kelulu enggau filem ke dilakunka peranak menua tu mega mantu ngangkatka nama Miri enggau Sarawak ba mata orang ke meda.
Iya bechuntoka filem ‘Little Sunshine’ mandangka penau anak mit beumur 10 taun ari Miri, Louis Lau Heng Kai ke megai kelulu pemadu besai benama Lim Xiao Pan.
Filem asil iring Aron Koh Kang Boon nya deka dipandangka ba serata Malaysia enggau ulih dipeda ba luar Sarawak.
“Endang pekara dikearapka ktai iya deka mantu ngelakuka Miri enggau nyadi pelasar kitai enggau aku pechaya tu deka mantu sektor dagang temuai,” ku iya. -TVS
