DARO, 3 Jan: Pengawa nuntut hak Sempekat Malaysia 1963 (MA63) ukai pekara ke mit laban nya bekaul enggau pemaik sereta pengidup jemah rayat lebih agi ba Sarawak enggau Sabah.
Pia ku Kaban Parlimen Tanjong Manis, Yusuf Abd Wahab ti nerang isu bekaul MA63 patut diperati siti pengawa dikena negapka status sarawak nyadi pengenap ngagai penumbuh sebuah menua ke menyana sereta tegap.
“Anang kitai ninga MA63 nya baka RM60 aja, tu ukai utai dipinta enti enggau mata duit diatu abis nadai beratus juta, enti enda bebilion, ukai nya mimit laban nya mih ninting hari kitai ninga, kitai ninga pasal peminta tu, ukai nya mit, peratika enti duit beratus juta tu datai ke Sarawak, berapa mayuh projek kitai ulih gaga, berapa siti genturung pendiau kitai ulih meri, berapa mayuh jematan, berapa mayuh jalai, berapa mayuh tiang pemanchar kitai ulih gaga,” ku iya.
Iya madah munyi nya maya ngulu pengawa Makai Selamat sereta Pengerami Tuai Begulai enggau Rayat ba Kampung Saai, ditu Hari Minggu.
Berebak enggau nya, Yusuf andal perintah penyerakup ke ditumbuh ulih negap enggau meri pengelantang ke pemaik lebih agi ngagai sarawak.
“Kitai ngarap enggau pemujur tu, penyampau menteri kitai bisi lima iku nyengkaum sapit menteri besai, enam sapit menteri, deka meri pengering, pengandal, meri lebih mayuh agih, lebih mayuh agi projek, lebih mayuh agi belanja, lebih kering agi peminta kitai iya nya nuntut MA63,” ku iya. -TVS
