MUKAH, 2 Jan: Siku orang tuai ke lenyau maya ngiga buah maram ba kebun ke besemak di Jalai Mukah-Balingian kenyau ari pagi Hari Minggu udah ditemu sehari tu tadi.
Sahminan Mohtar beumur 81 taun nadai mulai ke diri ngagai rumah iya di Kampung Tutus Hilir, Mukah kenyau pukul 6 lemai Hari Minggu.
Tuai Polis Pelilih Mukah, Deputi Superintendan Muhamad Rizal Alias madah, Sahminan ditemu raban penyidi enggau penyah penusah (SAR) likun ba endur urung 1.5 kilometer penyauh ari Palan Langkau Arau SAR pukul 1.30 ngalih hari, Hari Satu.
“Tudah ke ngaga ripot iya nya anak iya madah apai iya nurun ngiga buah maram ngagai kebun kenyau ari pukul 9 pagi kemari,” ku iya madah ngagai media.
Ku iya, SAR dipejalaika berengkah pukul 10.30 pagi.
“Maya raban SAR tetemuka tumpuk buah maram dipelaba enggi Sahminan ditinggalka ba tisi jalai, sida terus nitihka jalai nya lalu ngujungka tetemuka iya urung 1.5 kilometer ari palan langkau SAR pukul 1.30 ngalih hari,” ku iya.
Ku Rizal, Sharminan udah nya dianjung ngagai Sepital Mukah ngambika diperubat. – TVS
