MIRI, 2 Jan: Industri minyak enggau gas dipelaba deka terus mansang beduduk ari pengawa ke dipejalaika Petroleum Sarawak Berhad (PETROS) dalam bejalaika pengawa ngerudi enggau nyidi kandang endur baru ke bisi pengeraja asal nya.
Menteri Perengka Pengangkut ke mega Kaban Kunsil Nengeri (ADUN) Senadin, Dato’ Sri Lee Kim Shin maya mansutka pekara nya madah aktiviti nya kebendar ulih mantu Sarawak nyumanka ekonomi, sereta nyapai juluk nyadi nengeri ke ngembuan penatai pemisi tinggi manggai taun 2030.
“Kitai mega melabaka ba taun ti deka datai, aktiviti industri minyak enggau gas deka nambah.
“PETROS mega dipelaba deka bejalaika pengawa ngerudi minyak ba darat, ditu.
Kelimpah ari nya, aktiviti minyak enggau gas di tasik, aku dipadahka mega deka nambah sitak-sitak baru ke mujur ditemu sida ngundan minyak enggau gas,”ku iya.
Nerang silik, Kim Shin madah, ngelansa pasal adan menua Brunei enggau Miri, ke udah dibuka, dikearap ulih lama agi dibuka nyentuk tengah malam baka sebedau pandemik Covid-19.
“Di Miri, kitai melabaka taun baru tu, mayuh aktiviti ekonomi deka nambah.
“Kitai ulih meda mega iya nya adan menua Brunei enggau Miri diatu udah dibuka enggau bejalai baka selama tang naka tu pengawa muka pintu adan menua nya berengkah pukul 6 pagi nyentuk 10 mala.
“Suba kekadang datai ke tengah malam. Nyangka taun deka datai enti Covid-19 udah pukas, kitai ngarapka pintu adan menua nya ulih dibuka nyentuk pukul 12 tengah malam,” ku terang iya.-TVS
