MIRI, 2 Jan: Ecobrick tauka bata eko ti digaga ari plastik ti enda ulih dikena baru udah dipilih nyadi kereban projek dinding gadung tauka “The Green Wall of Miri”.
Ku Chairman Gerempung Pedagang Penguna Barang Lama Miri, Bryan Chia Sak Chan, lebih 10,000 butul ecobrick udah digumpul dikena ngaga dinding nya.
“Kami deka ngena ecobrick tu dikena ngaga siti dinding dikumbai “The Green Wall of Miri ti ngembuan peninggi 3 meter. Nya alai, The Green Wall of Miri tu deka digaga sepemanjai 57 meter, lalu deka dipasukka dalam Malaysia Book of Record.
“Kelimpah ari nya, kami udah mujur ngumpul 11, 464 butul ecobrick ti ngembuan pemerat 1.9 tan ti ulih dikena baru. Kitai ngembuan juluk ti besai, kitai udah nganjung peminta ba Guinness Book of Record ungkup 20,000 butul. Nya juluk ke ke lebih besai agi,” ku iya rambau Pengerami Bejadika Ecobrick Gerempung Kwong Wai Siew enggau kerejasama Gerempung Pedagang Penguna Barang Lama Miri.
Ku iya, Gerempung Kwong Wai Siew mega nyereta dalam projek ecobrick tu lalu udah ngaga urung 500 butul ecobrick.
“Sepengudah ngumpul 500 butul ecobrick tu, kami bisi ngerikod bantu ari gerempung tauka organisasyen sentang projek ecobrick tu. Nyadika chunto, siti dinding lebih kurang 500 butul, 500 butul nya sama enggau 100 kilo plastik ti ulih dikena baru sereta 200 liter, kilogram nya petrol udah kurang sama enggau 600 CO2. Nya meh tanggung pengawa kitai dalam mantu nyaga rampa menua, ” ku iya.
Ecobrick diproses ari uras plastik ti udah dipepat sereta diguntin mit, lalu dipasukka dalam butul nyentukka butul nya rangkai.
Naka tu, sepenyampau 26 organisasyen bisi ngaul dalam projek tu nyengkaum 21 sekula, tiga ejensi perintah enggau dua Gerempung Ukai Dikuasa Perintah (NGO). -TVS
