KUCHING, 29 Dis: Pakar perubat nyambut manah atur Opis Menteri Pengerai (KKM) ti deka negapka penyikap napi penambah kes COVID-19 ke disadang nyadi ba menua tu, nengah chara nambahka peratus orang ngambi dos pengalak.
Tebal agi, pengudah menua China ngerikodka penambah kes penyakit nya ti ba tikas ngirauka ati Gerempung Pengerai Dunya (WHO).
Ku Pegawai Pengerai Bagi Menua Betong, Dr Johnny Pangkas madah, atur ti dipejalaika KKM nya nyerangkung meransang mensia mayuh ke bedau ngambi dos pengalak kedua COVID-19 dikena mantu nyeliahka diri dirampit penyakit sereta ngurangka penambah kes penyakit nya.
“Entara pekara ti dikemeratka KKM iya nya meransang mensia mayuh enggau sida ke bisi komorbid ke bedau betuchuk vaksin pengalak lengkas agi ngambi vaksin nya.
“Kedua, kita ke bisi kelai penyakit nya mesti tumu nganjung diri beperesa, tauka meresa pengerai diri ba rumah, udah nya ngisi penerang ba dalam MySejahtera. Semua pekara ba dalam aplikasyen nya agi bedau dikena baka sebedau tu,” ku iya rambau ditelefon pengarang berita TVS lebuh Hari Tiga.
Berebak enggau nya, Dr johnny nerang, KKM mega deka nentuka semua Palan Beratika COVID-19 (CAC) ba serata menua tu nyikap diri nerima penyampau pesakit ke tinggi.
Palan nya mega deka berengkah bejalaika pengawa berubat Paxlovid (Nirma-trelvir tauka Rito-navir) ungkup pesakit COVID-19 ti berisiko tinggi, beratika sereta matau pesakit ke mesti dianjung ke sepital.
“Pemadu manah enti kitai nyeliahka diri ari palan tauka endur ke sekut tauka bededat. Pia mega, seruran bekenaka sengkabung mua taja pan atur nya udah dilunggarka perintah.
“Kitai ke suah bejalai tauka ngelawa endur ke mayuh orang sigi diperansang ngena sengkabung mua, lebih agi sida ke berisiko tinggi. Beperesa pengerai enti sema sakit sereta nitihka sanding penemu ke diberi dutur,” tandu iya.
Iya ngelalau mensia mayuh, lebih agi sida ke bisi komorbid terus ngemeratka pengerai diri, nitihka gerah ti dipadahka KKM tauka opis pengerai.
Sebedau tu mega,KKM ngelalau mensia mayuh terus ngemeranka daya idup bepengerai enggau likun dikena nyeliahka diri ari kena rampit COVID-19 sereta penyakit berampit ke bukai.
Ba pengerembai ke sama, Tuai Direktor Pengerai Tan Sri Dr Noor Hisham Abdullah meransang raban gawa di luan enggau sida ke berisiko tinggi lengkas ngambi tuchuk vaksin pengalak COVID-19. – TVS
