KUCHING, 25 Dis: Menteri Besai (PM) Datuk Seri Anwar Ibrahim meri Selamat Hari Krismas ngagai semua raban Kristian di menua tu.
Nengah pesan Hari Krismas iya kemari, Anwar madah Hari Krismas tauka Hari Natal endang hari besai ngagai raban bepengarap Kristian enggau sida ti ngerami iya begulai enggai diri sebilik enggau bala bakih ninting taun.
“Laban ke nyadi sebuah menua ke diuan pupu bansa enggau main asal, endang udah nyadi adat endur kitai ngerapitka agi kaul entara rayat seraya meri leka jaku ke manah ngagai sida.
“Nerenak enggau narak ulah beserakup ukai semina dilempai ngagai bahu bala ketuai ke merintah, tang genap rayat mesti ngesan tanggungpengawa enda putus dalam nyaga pengelikun, pengelantang sereta semangat beserakup.
“Jaku pandak tauka pesan ke bisi bau pemenchi enggau nguji ngajum bida mesti dibuai ngena ulah pengasih enggau kemerah,” ku iya nengah pesan Krismas 2022.
Nangkan ke nya, Anwar ngarapka pengerami Krismas taun tu lebih richah sereta mai pengelikun, pengelantang enggau penyenang sereta penyerakup ngagai menua Malaysia ke tebilang ketegal rayat ti angkunka ulah adil.
“Nuju sida ti mulaika diri ngagai menua, aku mesan minta kita bejimat maya ba rantau jalai,” ku iya.-TVS
