KUCHING, 24 Dis: Pelasar politik ke ngatika diri nengah penumbuh Gabungan Parti Sarawak (GPS) endang atur ke pemadu manah dikena nentuka sada Sarawak enda tengelam ba tikas nasional.
Premier Sarawak, Datuk Patinggi Tan Sri Abang Johari Tun Openg madah nadai orang bukai ke lebih lurus penemu kelimpah ari orang Sarawak empu dalam negika hak ungkup Bumi Kenyalang.
“Nya alai, aku meri terima kasih besai ngagai rayat Sarawak laba udah meri pengandal enggau meri sukung ke tegap ngagai GPS ngambika terus bejalaika pengawa nyaga pengelantang Sarawak.
“Perintah GPS udah meri sukung ngagai Perintah Penyerakup baka ke diperambu Yang Dipertuan Agong laban pekara ke pemadu beguna jam ke diatu iya nya negapka atur pengawa menua.
“Pia mega, pengawa nyiri Sapit Menteri Besai enggau empat menteri penuh ari Sarawak dalam Kabinet Penyerakup ngujungka Sarawak diberi tanggungpengawa ke chukup besai dikena nentuka atur pengawa menua bejalai enggau lanchar ungkup timpuh lima taun,” ku iya nengah Pesan Krismas enggau Taun Baru ke dibantai Hari Enam.
Udah nya, Abang Johari madah ba penemu Perintah GPS pekara ke lebih beguna iya nya ngalahka semua pekara bukai ngambika pemaik enggau hak Sarawak baka ke udah ditanggam dalam Kunstitusyen Perintah Besai enggau Sempekat Malaysia 1963 (MA63) dititih.-TVS
