KUCHING, 24 Dis: Raban orang ke tasah ampuh bah sereta dipindahka ngagai Palan Pengenduh Sementara (PPS) deka nerima bantu pengasih sepenyampau RM1,000, ku Chairman Komiti Penyangga Penusah Nengeri (JPBN) Sarawak, Datuk Amar Douglas Uggah Embas.
Kenu ku Sapit Premier Sarawak nya, bantu pengasih nya ditiki lalu nyadi takat ke baru dibanding enggau penyampau bantu RM500 ti kala diberi ex-Menteri Besai, Dato Sri Ismail Sabri Yaakob.
“Kitai deka naka ulih ngatur tu ngambika bantu pengasih tu ulih diberi enggau lengkas.
“Ungkup sida ke bedau mindah ngagai sebarang PPS, Pegawai Opis Pelilih enggau Residen deka berati sekalika sida patut diberi bantu nya.
“Tang naka ke diatu, barang sapa aja tebunsa endang deka dibantu kami,” ku Uggah rambau aum pemberita maya pejalai ngabas PPS Sungai Bedaun, ditu, kemari.
Sama bisi enggau ngabas PPS Sungai Bedaun tu iya nya Premier Sarawak, Datuk Patinggi Tan Sri Abang Johari Tun Openg enggau Kaban Parlimen Santubong, Datuk Sri Nancy Shukri.
Berebak enggau nya, iya mega udah ngasuh tuai komuniti enggau penghulu meri tangkan ngagai nembiak redak sida patut ngadang napi penyadi ampuh bah kelimpah madah ngagai raban bekuasa nyema bisi dituntung penusah bah ba genturung pendiau diri.
“Tu dikena nentuka bantu ulih diatur enggau manah,”ku iya.
Dulu ari nya, Uggah enggau Premier Sarawak Datuk Patinggi Tan Sri Abang Johari Tun Openg ngabas PPS Sungai Bedaun endur 91 iku peranak ke tasah bah ari Kpg Sungai Bedaun ngenduh. – TVS
