KUALA LUMPUR, 23 Dis: Hari berunggu ujan dipelaba terus nyadi ba sekeda kandang endur di Sarawak nyentuk pagila (Hari Enam).
Nampung penerang dibantaika Bernama, jaku gerah udah dikeluarka Opis Meteorologi Malaysia (MetMalaysia) pukul 9 pagi tu tadi madahka, ujan bangat ba tikas ke ngirauka ati disadang nyadi ba Kuching, Serian, Samarahan, Sri Aman enggau Betong seraya ujan bangat ba tikas ke balat dipelaba nyadi di Sarikei sereta Mukah ke ngaul Tanjung manis enggau Daro.
Ujan berunggu ba tikas bejejaga dipelabaka nyadi ba Sibu, Mukah (Matu, Dalat enggau Mukah), Bintulu, Miri (Subis, Beluru, Miri enggau Marudi) sereta Limbang.
Berebak enggau nya, Ejensi Mutarka Penusah Ngenyit Menua (NADMA) nengah penerang di Facebook minta Komiti Mutarka Penusah renggat nengeri tauka pelilih dibuka berindik ari gerah nya.
Komiti nya mega dipinta nambahka pengawa nyikap diri napi penusah ke nyadi ba sebarang maya, lebih agi ba kandang endur ke mudah ampuh.
“Genap Palan Pengenduh (PPS) mesti disikap enggau barang ke diguna ninting hari enggau ‘Pos Kawalan Tempat Kejadian’ (PKTK) bisi semua aset operasyen ke chukup, ulih dikena sereta sedia dikena,” ku iya.
NADMA nengah Palan Matau Penusah Menua (NDCC) seruran matau gaya parameter penerang teknikal sereta bekerejasama enggau mayuh macham ejensi teknikal ke bekaul.-TVS
