KUCHING,17 Dis : Peranak ke diau ba sitak Jelalong-Tubau di Murum diatu nadai agi berasai nangi nengah jematan ke baru sepengudah penembu jematan besi 32 meter pemanjai nukar jematan kayu ke udah repuk.
Kaban Kunsil Nengeri (Adun) Murum Kennedy Chukpai Ugon madah, bekau ari penembu jematan besi nya mega peranak menua Jelalong enggau Tubau diatu tentu berasai lantang agi bejualka asil utai tanam sida baka kepala sawit.
“Jematan besi ke baru tu deka meri pemaik ngagai peranak ke diau besemak enggau serikat ke bekaul laban jematan tu endang siti batang jalai ke ditengah rembus ngagai Jalai Bakun-Bintulu.
“Penemu jematan tu mega mandangka kerejasama manah entara raban serikat enggau peranak menua tu sereta aku empu dalam nyendiaka perengkaguna dikena nyungkak penatai pemisi rayat.
“Terima kasih ngagai kerejasama semua raban ke udah besukung nyentuk ke jematan besi tu mujur digaga,” ku iya.
Kennedy mansutka pekara nya ba laman Facebook Pusat Servis Masyarakat DUN Murum bekaul enggau pengawa bejadika Jematan Sungai Pesu ke baru tembu digaga sebuah serikat ladang kelapa sawit di Jelalong-Tubau, kilah ensana.
Sama bisi datai maya bejadika jematan besi tu bala pemesai kompeni ladang Samling di Jelalong Tubau, Penghulu Joshua William, Tuai Komuniti Tubau Jelalong Tr. Lichong anak Along, Chairman Komiti Pengatur Pengawa (JTAC) Jelalong Tubau, Maren-Maren Uma sereta ke bukai.
Ungkup penemu, projek ngaga Jematan Besi Sungai Pesu, Tubau Bintulu tu berengkah 15 Febuari 2022 lalu ditaga tembu kena 15 Febuari 2023.
Reti nya, jematan tu udah mujur tembu tumu ari timpuh ke diperambu berekat ari pengeransing enggau pemanah kerejasama semua raban ke bekaul.-TVS
