Tukuh Kubu Rentap ulih mantu nyungkak sektor dagang temuai di Betong

BETONG, 11 Dis: Perintah Sarawak terus chakah deka ngangkatka Bukit Sadok nyadi produk dagang temuai, seraya nyungkak sektor dagang temuai ba Betong.

Sapit Premier Sarawak, Datuk Amar Douglas Uggah Embas madah, nya entara kebuah perintah udah ngungkupka duit turu sepenyampau RM16 juta dikena ngaga tukuh Kubu Rentap ba endur asal di Bukit Sadok.

Uggah ke mega Kaban Kunsil Nengeri  (ADUN) Bukit Saban nerang, Bukit Sadok sigi dikelala enggau sejarah kubu Bujang Berani Iban, Rentap.

“Kaunsil Pelilih Betong ke nyadi ejensi bejalaika projek nya diatu agi benung ba renggat ngaga pemutus nyendiaka langkar replika kubu nya,” ku iya rambau ba dalam aum senentang projek nya ke diatur ba Opis Pelilih Mit Spaoh lebuh Hari Enam.

Ku iya, projek nya dibagi ngagai empat kompenan ti nyerangkung ngemanah jalai tama nuju ke kaki Bukit Sadok, ngaga palan temuai enggau endur ngengkah kerita ba kaki Bukit Sadok, nyeruri trek niki bukit sepanjai 3.4 kilometer ke tuchung Bukit Sadok sereta ngaga replika Kubu Rentap di atas Bukit Sadok.

Sebedau tu Uggah madah, Bagi Menua Betong mayuh endur ke ulih dikemansangka nyadi entara palan pematak temuai datai ke pelilih nya.

“Diatu kitai deka ngelala, ngemansangka sereta bedajaka semua kandang endur tu awakka ulih nyadi palan ke ulih dilawa mensia mayuh.

“Nya entara kebuah perintah nengeri ngemendarka duit turu nya dikena ngaga tukuh Kubu rentap ti deka disikap enggau perengkaguna ke lebih manah,” ku iya.

Kelimpah ari nya, pemansang sektor dagang temuai di Betong deka meri peluang ngagai rayat ke mendam di pelilih nya nambahka tikas ekonomi sekalika ari sukut bedajaka produk dagang temuai sereta ngaul diri ba pengawa mandangka seni enggau main asal.

“Tu siti ari chara ke pemadu manah dikena kitai ngenang taba tauka palan ti ngembuan sejarah sereta cherita lama seraya meri basa ngagai niang bujang berani Rentap,” tandu iya.

Entara sida bukai ke ngulu aum nya, Kaban Parlimen Betong Dr Richard Rapu, Sekretari Kaunsil Pelilih Betong Charlie Keling, Injinir Seksyen JKR Bagi Menua Betong Oliver Ngabong sereta dan Pegawai Pengatur Pengawa Pelilih Mit Spaoh Lister Clement Guwie. -TVS