SIBU, 11 Dis: Rayat di nengeri tu dilalau seruran meresa pengerai diri taja pan nadai kelai sakit, lebih agi sida ke diau mendam ba menua ulu enggau menua pesisir.
Sapit Menteri Pelajar, Inovasyen enggau Pemansang Pengelandik, Datuk Dr Annuar Rapa’ee madah, beperesa pengerai tumu chukup beguna, tebal agi siku-siku orang ke bisi sejarah diri sebilik kala ditepan penyakit raya.
Ku Dr Annuar, mayuh penyakit raya enda ngayanka kelai, tang mensia mayuh ditangkan meresa tikas pengerai diri sebedau umur manggai 40 taun.
“Aku suah ngelalau sida ke bisi penyakit ti dikumbai kitai ‘non-communicable diseases’ iya nya penyakit ke enda berampit. Kelimpah ari, penyakit COVID-19.
“Kemi manis, tinggi darah, penyakit tungkul atau enda berampit. Tang, pekara ke mesti diberi perati enti sema ruang bilik nya bisi sejarah penyakit raya. Sida ke bisi semua sejarah penyakit nya ti nyengkaum parai ngenyit mesti tumu meresa pengerai diri sebedau umur manggai 40 taun,” ku iya rambau ditanya pemberita beserimbai enggau Program Jelajah Sihat Sarawakku Sitak Kunsil Nengeri (DUN) Nangka ba Perpustakaan Desa, Kampung Bahagia Jaya Sibu lebuh Hari Enam.
Berebak enggau nya, Dr Annuar ke mega Kaban Kunsil Nengeri (ADUN) Nangka ngelalau peranak ba sitak nya ngambi peluang beperesa pengerai nengah program meresa pengerai enda bebayar tauka pechuma, lebih agi sida ke ari ruang bilik B40.
Bisi tujuh genturung pendiau ba DUN Nangka udah dipilih nyadi endur ngatur program meresa pengerai enda bebayar.
“Nyadi, program ti diberi nama ‘Jelajah Saringan Kesihatan’ iya nya disediaka ungkup peranak ke mendam DUN Nangka.
“Nengah awak tu aku beterima kasih laban bisi program tu ke diatur Sihat Sarawakku enggau semua sida iya nya pengari tauka ejen Opis Menteri Pengerai Malaysia. Taja pan program tu ngaul ruang bilik B40, semua orang ulih ngulu program tu,” tandu iya.
Program ‘Jelajah Sihat Sarawakku’ diatur ba DUN Nangka berengkah ari 10 nyentuk 19 Disember 2022.
Mayuh macham program beperesa pengerai bisi disedia nyengkaum meresa tikas darah, meresa tubuh enggau Rikod Pemerat Tubuh (BMI) sereta meresa gaya pemesai tubuh.-TVS
