KUCHING, 10 Dis: Projek ngaga Kompleks Unit Ungkup Pengarap Bukai (UNIFOR) ti beungkus penyampau RM70 juta ba Jalai Ong Tiang Swee diatu benung bejalai lanchar.
Sapit Premier Sarawak, Datuk Amar Douglas Uggah Embas rambau ngabas taba projek nya hari lima madah, naka ke diatu iya gaga ati meda pemansang projek nya udah manggai 2.32 peratus ti dibanding baka ke ditimpuh iya nya 2.35 peratus.
Pengawa nyendia enggau ngaga begunan peninggi 10 ringkat ba endur pemesai 1.2 hektar nya berengkah kena bulan 10 taun siti nyin suba.
Pia mega, pengawa nya tadi dipejadika Premier Sarawak Datuk Patinggi Tan Sri Abang Johari Tun Openg.
“Naka ke diatu, aku lantang ati meda pengerembai projek nya,” ku iya.
Beduduk enggau nya, Uggah ke mega Menteri Infrastrakcha enggau Pemansang Penyangkai Kapal nerang, pengawa ngaga projek nya tejanggal ketegal enda chukup perengka sereta kemisi hari besai ke ditambah ba bulan siti nyin kemari.
Pengawa Uggah ke ngabas taba nya, disempulang Kaban Kaunsil Pengibun Reta UNIFOR Datuk Janang Bungsu, Direktor UNIFOR Datu Jack Aman Luat.
Sebedau nya, sida diberi licha senentang pengerembai projek nya ari arkitek David Ong.
Bepelasarka rikod, perintah sarawak udah ngemendarka agih belanja sepenyampau RM100 juta ungkup taun baru ngagai UNIFOR.
Uggah ke mega menteri ti nguasa UNIFOR madah, agih belanja nya mandangka penyiru perintah nengeri ba baruh iring Gabungan Parti Sarawak (GPS) ti meri perati senentang peminta guna ari unit nya, lebih agi dikena ngintu pengelantang pengarap bukai ba nengeri tu.
“Ba taun baru, sepenyampau RM100 juta udah dikemendarka dikena nangkup peminta ti seruran betambah ari serata nengeri. Tu singkang ke chukup manah diambi perintah ke semina bisi ba Sarawak.
“Tu mega mandangka perintah nengeri ngemeratka pengelantang ti mungkur semua pengarap ba nengeri tu,” tandu iya.
Sarawak betuah laban nadai betapi enggau penemu pengarap ke ekstrem sereta isu ti tau ngeruga penyerakup.
Isu pengarap jarang nyadi penanggul ba dalam pengidup rayat pupu bansa laban seruran bebasaka pangan diri, bisi penyiru ti nyadi tiang penyerakup enggau pengelantang semua. – TVS
