MIRI, 10 Dis: Pengawa ngerembaika penerang diatu majak muntang laban semua orang ulih nulis enggau ngemansutka sebarang aja pekara nengah pelasar pelasar internet enggau media rama beduduk ari pemansang ke chukup manah ba jeman teknologi, tang nya mega ngujungka pengerembai berita enggau penerang bula ke nadai belebas kemaya hari tu.
Premier Sarawak, Datuk Patinggi Tan Sri Abang Johari Tun Openg madah, pekara ke bekaul enggau pengawa ngerembaika berita enggau penerang ke bula nadai belebas benung diputar.
“Tu endang isu ke benung diputarka Perintah Penyerakup nengah Opis Menteri Komunikasyen Digital sereta ngaul pengawa nyendiaka servis baka TikTok enggau Facebook dikena nagang penerang provokatif enggau bula tang taja pia ukai semua pemain media rama enda manah,” ku iya nengah penerang ke dibantai ba Pengerami Anugerah Pemberita Kenyalang (KJA) 2022 Renggat ke-34 diatur Serakup Gerempung Pemberita Sarawak (FSJA) di Hotel Imperial Miri malam tadi.
Teks jaku iya dibacha Sapit Premier Sarawak, Dato Sri Profesor Dr. Sim Kui Hian ti ngarika iya ba pengerami nya.
Ku iya, tanggungpengawa ke digaga media dalam pemansang menua enda patut dibantah.
“Pengawa ngerembaika berita ke betul sereta amat pasal program enggau polisi pemansang perinbtah beguna amat dalam nentuka menua, lebih agi Sarawak ulih terus nyingkang ke mua enggau mujur ke pemaik rayat,” ku iya.
Iya ngarapka raban media terus nitihka atur pemberita dikena nentuka ripot ke digaga ngembuan tuju enggau nempa komuniti ke bepenemu.
Pengerami Meri Anugerah Ninting Taun diatur FSJA tu diatur dikena meri basa ngagai pengawa ke udah digaga media dalam mantaika penerang ke amat ngagai mensia mayuh.
Bisi 461 penyereta ungkup anugerah nya diterima taun tu dibanding 338 penyereta ba taun nyin kemari lalu 11 kategori dipekitka disempulang enggau perais manggai RM250,000 ungkup bala pemenang anugerah.
Pemberita ke dipadu ngempu Anugerah Tokoh Media ungkup taun tu iya nya Toman Mamora @ Tagor Toman Debataraja Mamora, konsultan enggau pemansik komunikasyen, beduduk ari jasa enggau pengawa ke udah dikereja iya dalam bidang pemberita kenyau ari pun taun 1990-an nyentuk diatu. – TVS
