KUALA LUMPUR, 10 Dis: Bisi 27 iku Sapit Menteri Perintah Besai udah mujur angkat sumpah ba mua Yang di-Pertuan Agong, Al-Sultan Abdullah Ri’ayatuddin Al-Mustafa Billah Shah ba Istana Negara ditu, sehari tu.
Semua sapit menteri nya nya bela macha danji tangkup pengawa enggau penaluk sebedau nyain dokumen rasmi pengawa diri seraya dikemataka Tuai Akim Menua, Tun Tengku Maimun Tuan Mat enggau Kepala Sekretari Menua, Tan Sri Mohd Zuki Ali.
Menteri Besai, Datuk Seri Anwar Ibrahim enggau bini iya, Datuk Seri Dr Wan Azizah Wan Ismail bela datai ngemataka Pengawa Beradat Nyerahka Surat Chiri enggau Adat Ngangkat Sumpah Pangku Pengawa enggau Taluk Sereta Sumpah Nyimpan Resia berengkah pukul 3 lemai.
Dua Sapit Menteri Besai, Datuk Seri Dr Ahmad Zahid Hamidi ke mega Menteri Pengawa Menua Pesisir enggau Kandang Menua sereta Dato Sri Fadillah Yusof ke mega Menteri Pengawa Bekebun enggau Komoditi, bela datai disempulang bini diri empu.
Sama datai Kepala Polis Menua, Tan Sri Acryl Sani Abdullah Sani enggau Panglima Raban Soldadu, Jeneral Tan Sri Affendi Buang.
Semua Sapit Menteri dibaruh Perintah Penyerakup tu ngangkat sumpah pengudah rintai nama Sapit Menteri dibantaika Anwar malam tadi.
Pengawa beradat nya raban sapit menteri nya dibagi ngagai empat raban lalu raban keterubah dipunka dua Sapit Menteri Pekara Wang iya nya Sekretari Besai UMNO Datuk Seri Ahmad Maslan enggau Sekretari Besai DAP, Steven Sim Chee Keong.
Sama bisi enggau raban tu iya nya Kaban Parlimen Kota Samarahan, Datuk Rubiah Wang ke dipadu nyadi Sapit Menteri Pemansang Menua Pesisir enggau Kandang Menua ; Kaban Parlimen Beaufort Datuk Siti Aminah Aching dipadau nyadi Sapit Menteri Pengawa Bekebun enggau Komoditi; Datuk Hasbi Habibollah dipadu nyadi Sapit Menteri Perengka Pengangkut ; Chan Foong Hin nyadi Sapit Menteri Betanam Betupi enggau Jamin Pemakai sereta Datuk Hanifah Hajar Taib nyadi Sapit Menteri Ekonomi.
Raban kedua bisi tuju Sapit Menteri iya nya Direktor Strategi PKR Akmal Nasrullah Mohd Nasir ke dipadu nyadi Sapit Menteri Pemansang Kaunsil Kandang Menua; Chairman Pakatan Harapan (PH) Melaka Adly Zahari dipadu nyadi Sapit Menteri Penyaga Menua enggau Datuk Seri Abdul Rahman Mohamad dipadu nyadi Sapit Menteri Kereja Raya.
Bela ba raban ke sama iya nya Direktor Komunikasyen Barisan Nasional (BN) Datuk Seri Dr Shamsul Anuar Nasarah dipadu nyadi Sapit Menteri Dalam Menua; Chairman DAP Johor Liew Chin Tong dipadu nyadi Sapit  Menteri Dagang Entarabansa enggau Industri; Kaban Parlimen Lahad Datu Datuk Mohamad Yusof Apdal dipadu nyadi Sapit Menteri Pelajar Tinggi enggau Sapit Presiden Parti Bersatu Rakyat Sabah (PBRS) Datuk Arthur Joseph Kurup dipadu nyadi Sapit Menteri Sains, Teknologi enggau Inovasyen.
Raban ketiga iya nya diuluka Tuai Orang Indu Parti Amanah Negara (Amanah) Aiman Athirah Sabu (Sapit Menteri Pemansang Orang Indu, Ruang Bilik enggau Raban Bansa) ditangkan ex-Tuai Indu  PKR Senator Fuziah Salleh (Sapit Menteri Dagang Dalam Menua enggau Ungkus Pengidup) enggau Kaban Parlimen Bukit Gelugor Ramkarpal Singh dipadu nyadi Sapit Menteri ba Opis Menteri Besai (Undang-Undang enggau Reformasyen Institusi).
Kelimpah ari nya Kaban Parlimen Sarikei Dato Sri Huang Tiong Sii dipadu nyadi Sapit Menteri Pengeraja Asal, Rampa Menua enggau Ubah Gaya Hari; Sapit Presiden PKR Senator K. Saraswathy (Sapit Menteri Pemansang Dagang enggau Gerempung Kerejasama); Kaban Parlimen Kimanis Datuk Mohamad Alamin (Sapit Menteri Menua Luar) enggau Kaban  Parlimen Batu Sapi Khairul Firdaus Akbar Khan (Sapit Menteri Dagang Temuai, Seni enggau Main Asal).
Raban kepenudi angkat sumpah iya nya Kaban Parlimen Kulai Teo Nie Ching (Sapit Menteri Komunikasyen enggau Digital); Kaban Parlimen Tanjong Lim Hui Ying (Sapit Menteri Pelajar); Kaban Parlimen Hang Tuah Jaya Adam Adli Abd Halim (Sapit Menteri Nembiak enggau Lumba); Kaban Parlimen Sepanggar Mustapha @ Mohd Yunus Sakmud (Sapit Menteri Orang Gawa); Kaban Parlimen Sibuti Lukanisman Awang Sauni (Sapit Menteri Pengerai) enggau Kaban Parlimen Hulu Rajang Datuk Wilson Ugak Kumbong dipadu nyadi Sapit Menteri ba Opis Menteri Besai  (Pekara Sabah, Sarawak enggau Pengawa Khas). – TVS
