KUCHING, 9 Dis: Penyerakup sereta ulah bebasaka pangan diri entara rayat pupu bansa di Sarawak ulih dijadika chunto nengeri bukai.
Menteri Penyerakup Menua, Datuk Aaron Ago Dagang madahka gaya idup ti lantang nya chukup beguna tebal agi diatu menua ngembuan perintah ti bepelasarka penyerakup.
“Kitai di Sarawak nadai ngembuan penanggul senentang penyerakup ba menua tu. Kitai idup enggau lantang ba ditu,” ku iya madah.
“Ngarapka utai ti diterenak sekalika ditan kitai ba ditu ulih dimalin tauka dijadika chunto nengeri bukai di Malaysia.”
Iya bejaku munyi nya lebuh ditemu pengarang berita di Padang Bilun Antarabansa Kuching, Hari Tiga.
Nangkanka nya, Aaron madah Librari Menua Malaysia (PNM), Opis Muzium Malaysia (JMM) enggau Arkib Menua ke sebedau tu ba baruh Opis Menteri Dagang Temuai diatu ba baruh pegai opis menteri iya.
Maya 2 Disember ke udah, Aaron ke mega Kaban Kunsil Nengeri (ADUN) Kanowit kenyau ari taun 2004 udah dichiri nyadi Kaban Kabinet Perintah Penyerakup ti udah dipadahka Menteri Besai Datuk Seri Anwar Ibrahim.
Iya sebedau tu megai mangku pengawa nyadi Sapit Menteri Pengerai II ari taun 2020 nyentuk ke taun 2022 ba baruh dua Menteri Besai iya nya Tan Sri Muhyiddin Yassin enggau Datuk Seri Ismail Sabri Yaakob. – TVS
