MIRI, 9 Dis: Opis Menteri Dagang Temuai, Industri Kreatif enggau Seni Pemerindang Sarawak, nengah Kaunsil Kraf Sarawak enggau ejensi ke bekaul, komited deka ngelangkar program ba baruh Strategi Pemansang Pasca COVID-19 (PCDS) 2030 enggau inisiatif ke bukai.
Tuju nya dikena ngerembaika industri krafjari ti tau meri penguntung enggau pemaik ngagai komuniti, lebih agi raban pedagang krafjari.
Opis menteri nya nyaran deka nyapai asil penatai pemisi lebih kurang RM83.6 juta ari asil nyual produk karfjari Sarawak.
Seraya nambahka penyampau pedagang kraf berejister ari 1,143 iku naka ke diatu ngagai 2,000 iku manggai taun 2030.
Ku Sapit Menteri Dagang Temuai, Industri Kreatif enggau Seni Pemerindang, Datuk Sebastian Ting Chiew Yew, ti diarika Pengulu Leonard Fung, entara inisiatif ti udah dipejalaika dikena nyapai saran nya, baka ngatur program dikena ngansah pengelandik ngeluar, kualiti produk enggau pengawa nyadi orang dagang.
“Entara inisiatif ke bukai ti udah dilanggur nyengkaum ngatur program pemansang kapasiti enggau ngulu dikena nambahka pengelandik chara ngeluarka produk, kualiti produk enggau pengawa nyadi orang dagang. Kedua, bekerejasama enggau ejensi bukai, ejensi perintah sereta siku-siku orang ba renggat nasional, serantau enggau entarabansa, lalu tu ulih ngemansangka sereta ngelakuka produk kraf ti bekualiti tinggi ba renggat global.”
Iya bejaku munyi nya ba Program Makai Lemai Minggu Kraf Ti Pemadu Manah Sarawak, ti berambaika jaku Kebanggaan Sarawak ba Miri, lebuh Hari Empat.
Kenu ku Sebastian, Kaunsil Kraf Sarawak, Gerempung Pemansang Krafjari Malaysia Pampang Sarawak, sereta industri ti bekaul deka bekerejasama ngatur program ngaul asil pengelandik jari dalam timpuh tiga taun ti deka datai.
“Kaunsil Kraf Sarawak begulai enggau Gerempung Pemansang Krafjari Malaysia Pampang Sarawak enggau pengemeran industri deka bekerejasama enggau opis menteri aku dikena ngatur program chara ngelakuka produk ti deka dipejalaika di serata Sarawak dalam timpuh tiga taun ti deka datai. Tu deka meri mayuh agi peluang nyual enggau bedaja produk pedagang kraf di Sarawak,” tandu iya.
Program nya mega ngemataka pengawa nyain memorandum pemereti ati entara Batik Linut Sdn Bhd enggau sekeda pengari ejensi sereta pedagang, ngambika ulih sama ngerembaika industri krafjari. – TVS
