BANDUNG, 8 Dis: Program Sarawak Young Designers (SayD’Signers Sarawak) bisi daya mantu ngangkatka penampak nama sarawak ba renggat dunya.
Premier Sarawak Datuk Patinggi Tan Sri Abang Johari Tun Openg pechaya, nengah program nya Sarawak mujur nempa pengereja pengawa ke landik ngaga keresa rumah sama tikas ba renggat dunya dudi hari.
“Aku chukup gaga ati pengudah nemu naka ke diatu program tu udah mujur nempa 26 iku penengkebang biak ke udah tembu ngambi latih ba Institut Teknologi Bandung (ITB), Indonesia kenyau ari taun 2019,” ku iya.
Kenyau ari taun 2019, program nya udah nempa 26 iku pengereja pengawa biak ti mujur nembuka latih sida ba Institut Teknologi Bandung (ITB), Indonesia.
Beduduk ari nya, Abang Johari nengah teks jaku iya ti dibacha Sapit Premier Sarawak Datuk Amar Awang Tengah Ali Hasan nerang, pemujur program SayD’Signers Sarawak nya deka meri bekau ke besai ba dalam pemansang industri kayu ramu di nengeri tu, tebal agi ngaul industri keresa rumah.
“Nengah kerejasama begulai enggau ITB nyadika program latih nya lebih manah sereta mujur nambahka penau penemu senentang langkar ke patut dikena ngaga keresa rumah,” tandu Abang Johari.
Berindik ari nya, senutuk enggau Strategi Pemansang Pasca COVID-19 (PCDS) 2030, perintah Sarawak mekuhka pemansang sektor kampung lebih agi ngasilka produk ti berega tinggi baka Engineered Wood sereta keresa rumah.
“Industri kayu ramu iya nya sektor komoditi ekspot ke empat beguna pengudah petroleum, gis enggau LNG sereta sawit ti mantu nambahka asil ekonomi Sarawak. Industri tu mega nyadi entara sektor ti mei asil penatai pemisi nengeri kenyau ari taun 1960,” ku iya madah agi.
Industri nya nyadi entara sektor ke mantu nyungkak ekonomi Sarawak kenyau ari taun 1960.
