KUCHING, 6 Dis: Sarawak deka nyadi kuasa ekonomi pemadu besai ba Malaysia manggai taun 2030, ku Sapit Premier Sarawak, Dato Sri Dr Sim Kui Hian.
Beduduk ari nya, iya minta rayat Sarawak ke gawa ba luar nengeri bela nyaup ngemansangka ekonomi Sarawak.
“Jam diatu, kitai lumur tiga pemadu besai ari sukut ekonomi di menua tu, nadai isu sentang tu, udah nengeri kedua pemadu besai diatu iya nya Selangor ke ngembuan RM2.45 bilion bajet nengeri.
“Sarawak mega, ba taun 2018, ngembuan bajet nengeri sepenyampau RM5 bilion ke RM6 bilion, tang taun tu nya udah niki ngagai RM11 bilion,” ku iya.
Iya madah munyi nya maya Pengerami Makai Taun ke-20 PC Image Sdn Bhd enggau Nyuaka Anugerah Malaysia Book of Record (MBOR) ditu malam tadi.
Nya alai, ku iya rayat patut nemu tuju enggau kuing perintah lebih agi ari sukut peluang dagang ungkup pedagang ke mantu ekonomi Sarawak.
Dulu ari nya, Dr Sim ngemataka pengawa nyuaka setipikit MBOR ngagai PC Image Sdn Bhd laban udah mujur nyadi ‘Outlet Komputer Pemadu Besai ba Malaysia’ lalu pekara nya ngujungka organisasyen nya diatu nyadi sebengkah ari kedai komputer tebilang ba menua tu.
PC Image Sdn Bhd berengkah dibuka ba Kuching taun 2000 di Wisma Saberkas, diatu dagang sida terus ngerembai ke Sabah enggau Semenanjung Malaysia lalu ngembuan lebih 30 pampang ba serata Malaysia.- TVS
