KUCHING, 5 Dis: Datuk Seri Anwar Ibrahim netapka timpuh sebulan ngaga insur mutarka pekara ke lama tejanggal dalam Sempekat Malaysia 1963 (MA63).
Beduduk ari nya, iya ke mega Menteri Besai madah, pengawa nyiri Dato Sri Fadillah Yusof nyadi Sapit Menteri Besai (TPM) mega betuju mutarka isu nya.
Ku Anwar, iya enggai meda isu MA63 majak disebut.
“Sekeda ari pekara nya udah ulih diputar tang agi (bisi) ngirauka ati bakih kitai ba Sarawak enggau Sabah. Tu patut dirumban,” ku iya.
Iya madah munyi nya ba aum pemberita pengudah betuaika Aum Khas Keterubah Kabinet ba Begunan Perdana Putra, Putrajaya ditu, sehari tu tadi.
Bela datai ba aum pemberita nya Fadillah enggau Datuk Seri Dr Ahmad Zahid Hamidi ke mega Sapit Menteri Besai sereta Menteri Pemansang Menua Pesisir enggau Kandang Menua.
Anwar madah, Premier Sarawak, Datuk Patinggi Tan Sri Abang Johari Tun Openg sebedau tu madah iya udah bisi atur ti ngenusahka pengawa mutarka isu bekaul MA63.
“Nyema pekara nya dipatau tauka dibantaika perambu, siti atur sebaka entara Perintah Besai enggau perintah nengeri patut digaga,” ku iya.
Pekara bukai ke nekul ku Anwar iya nya proses pemendar ke ngaul mayuh ejensi sereta opis menteri.
“Tu aku arap (deka ulih) diperambu TPM awakka kitai bejalaika enggau lengkas,”ku terang iya. -TVS
